PROMÉ MINISTER GILMAR PISAS A HIBA KOMBERSASHON KU  PRESIDENTE ELECTO I VISE PRESIDENTE ELECTO DI COLOMBIA

Willemstad – Promé Minister sr. Gilmar Pisas ta riba un biahe di trabou na Colombia den representashon di Reino pa e inougurashon di sr. Gustavo Francisco Petro Urrego komo Presidente di Colombia, kual lo tuma lugá dia 7 di ougùstùs 2022.

 

Promé Minister sr. Pisas a hasi uso di oportunidat aki pa hiba kombersashon ku Presidente electo di Colombia sr. Gustavo Francisco Petro Urrego i Vise Presidente electo di Colombia sra.  Francia Elena Márquez Mina dia 6 di ougùstùs 2022.

 

Promé Minister sr. Pisas a felisitá ambos dignitario ku nan logro despues di e último elekshon na Colombia i a deseá ambos tur kos bon durante di e kuater añanan benidero.

 

Durante di e kombersashon ku Vise Presidente electo sra. Francia Elena Márquez Mina a toka diferente tema manera e.o. hustisia ambiental, hustisia sosial,  e aspekto di pas, genero i rasial, reparashon históriko, kambio di klima, krisis ambiental i tambe fortifikashon di ekonomia entre Colombia i Kòrsou.

Riba tur e áreanan aki ta deseá di por traha huntu ku Kòrsou i Hulanda i alabes kompartí eksperensia ku otro.

 

Durante di e kombersashon ku Presidente electo sr. Gustavo Francisco Petro Urrego a amplia riba e temanan manera e.o. e diferente tratadonan ku Colombia tin den negoshason ku Hulanda, MOU’s ku tin ku Kòrsou riba e áreanan di e.o. Peskeria, Kultura, Edukashon Agrikultura, Duana i Turísmo. 

A informá e Presidente electo tambe ku Kòrsou ta trahando riba un tratado komersial ku Colombia i ta finalizando e tratado di aviashon.

 

Presidente electo sr. Gustavo Francisco Petro Urrego a duna di konosé ku nan ke bai hasi mas uso di e relashonnan diplomatiko ku nan tin den Caribe pa por fortifiká San Andres, traha riba un sentro kultural i edukativo, duna mas atenshon na e parti di salubridat, integrá eksperensia ku e islanan den Caribe, krea oportunidat pa tin mas koperashon entre otro riba e áreanan di komersio i krusero.

Tambe e la elaborá riba kreamentu di un fondo ku por yuda esnan mas marginal ku por keda afektá pa e situashon di kambio di klima.

Di parti Colombia e la bisa ku lo trata di evitá kualkier avansé di e situashon aki i ta deseá di por traha huntu ku tur e islanan den Caribe.

 

Promé Minister sr. Pisas a splika Presidente electo sr. Gustavo Francisco Petro Urrego ku di parti Kòrsou tin e deseo pa sigui amplia i konkretisá e kontenido di tur e MOU’s i tratadonan ku Colombia.

 

Ambos kombersashon a bai den un hopi bon esfera.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: