OPORTUNIDAT PA PUEBLO MIRA MUNDIAL DI LITTLE LEAGUE

Minister di Deporte sr. Sithree van Heydoorn, ta krea e oportunidat pa pueblo por mira nos selekshon di Little Leaugue den akshon na Banda Ariba, Mei-Mei i Banda Abou

 

WILLEMSTAD –  Kòrsou por mira bèk riba un gran partisipashon di nos selekshon di Little League na e torneo na Williamsport. E selekshon di Little League tin sinku (5) wega gana i un (1) pèrdí. Djasabra awor nos selekshon tin un kompromiso importante kontra Chinese Taipei pa 12:30 di mèrdia.

Den kaso ku nos selekshon gana e wega akí, djadumingu 28 ougùstùs e selekshon lo ta den e gran final di e serie mundial di Little League na Williamsport. E logronan akí di nos hóben peloteronan a lanta entusiasmo serka hinter pueblo di Korsou. Esei ta motibu ku Minister van Heydoorn a krea e oportunidat pa pueblo por wak e wega di djasabra na e siguiente sitionan;

• Sentro di bario Montaña;
• Sentro di bario Brievengat;
• Sentro Multifunshonal na Fuik;
• Parke Himo i Bandera Ruthilio “Rudy” Rooi na Barber;
• P.W.F.C.

Den kaso ku nos selekshon gana i pasa pa e wega di djadumingo lo bolbe duna pueblo e oportunidat pa wak e weganan na e mesun sitionan akí.

Minister di Enseñansa, Siensia, Kultura i Deporte sr. Sithree van Heydoorn ta deseá nos selekshon di Little League tur klase di éksito i ta pidi pueblo di Kòrsou, pa for di distansia nos ban apoyá nos hóben peloteronan. Forma bo grupo i den seno di famia i amigu disfrutá di e partido di beisbòl.

Kòrsou ta grandi!

—

Sithree van Heydoorn

Minister di Enseñansa, Siensia, Kultura i Deporte