Karni no di kùr bendí via medionan soshal

Karni no di kùr bendí via medionan soshal

Willemstad – Departamentu di Asuntunan Veterinario a tuma nota di mensahenan riba medionan soshal kaminda ta bende karni di kabritu fresku na komunidat.  

Pa protehá salú di pueblo lei (Slacht- en Keuringsverordening 1933 no. 17) ta rigi ku tur kabritu, karné, baka i porko mester ser sakrifiká na abatuarnan di gobièrnu, kaminda ta kùr esakinan i pone un stèmpel aprobá dor di gobièrnu ora e resultado di kùring ta positivo. 

Nos kier alertá tur hende pa e riesgo pa salú ora konsumí karni ku no ta di kùr. E animal por tin un malesa kontagioso, pero tambe e sirkumstansha a-higieniko rondó di e matansa por forma un fuente di kontaminashon, kousando habrimentu di barika, sakamentu i tin ora ku konsekuenshanan mas grave.

Pa mas informashon por manda un e-mail na: info.uovz@gobiernu.cw.