Durante un konferensia di prensa a duna Tur detaye di e konsierto di BURNA BOY na Kòrsou

Durante un konferensia di prensa a duna

Tur detaye di e konsierto di BURNA BOY na Kòrsou

 

WILLEMSTAD: Djárason atardi na Amazia SUN SPLASH i su tim lokal a presentá un konferensia di prensa na unda ku a revelá tur detaye di e konsierto di BURNA BOY ku lo tuma lugá dia 28 di òktober próksimo den Curaҫao Festival Center. Presente tabata representante di SUN SPLASH ku a bin for di Hulanda pa e konferensia di prensa, sr. Michel Pascal, ku a elaborá riba e magnitut di e artista i konsierto. Djiwan Gonesh enkargá ku zonido, lus i produkshon pa Massive Productions a duna detayenan di e espektákulo. Efrem Mambi a elaborá riba e Pre-Show di e konsierto ku lo konta ku presentashon di popular kantante urban BJAY. Papiando di benta di karchi di e evento i e sekshon VIP ku a sorpresá tur hende i a ‘sold out’ den un tempu rèkert tabata Sergio Sankasting i Rugby Elmondalek di Unique Productions ku a amplia riba e logístika di e sekshon aki, pa finalmente Thakaidzwa Doran ku ta enkargá ku ‘crowd management’ detayá e aktividatnan den maneho i seguridat di públiko paden i pafó di Curaҫao Festival Center pa e anochi di 28 di òktober. Tambe presente tabata sra. Sucena Hortencia di Murray Attorney At Law enkargá ku e aspektonan legal i kontraktual di e artista i konsierto.

 

E konferensia di prensa a resultá realmente un evento ideal na unda ku prensa, i awor pueblo di Kòrsou por a sera konosí ku tur esnan ku tin algun siman trahando ya kaba riba e konsierto. Ademas, prensa a hasi preguntanan na lugá i ku sigur ta di balor agregá. Pa haña un fecha i un kompromiso pa un artista asina grandi i den tòp di popularidat no ta kos djawe pa mañan. A probechá di un oportunidat úniko ku e artista ta den Caribe. Dia 28 di òktober próksimo, portanan di Curaҫao Festival Center ta habri 8’or di anochi, pa 9’or lo tin presentashon di artista lokal urban BJAY ku su banda i ku lo presentá un repertorio variá ku lo feature otro artistanan lokal tambe. MC Chris Strick, MC Don T, Dj Krokzz i Dj Fab tambe lo ta den pre-show. Pa eksaktamente 11’or BURNA BOY lo subi esenario di Curaҫao Festival Center!

 

Kòrsou ta entusiasmá, retnan sosial ta yen di BURNA BOY i despues ku e kantante mes a konfirmá Kòrsou riba su kalènder di presentashon ta manera nèt e chispa ku tabata falta pa sende e motor p’asina nos kana yega e konsierto dia 28 di òktober próksimo.  Ayera riba dia di e konferensia di prensa, tabata falta nèt 1 luna pa e anochi vibrante den Curaҫao Festival Center. Despues di a tour siudatnan manera Detroit, Atlanta, Minneapolis, Houston, Boston i mas den yüli ultimo, e organisashon SUN SPLASH ta invitá Kòrsou p’e  konsierto di e artista ganadó di Grammy BURNA BOY ku su banda aki na Kòrsou! Karchinan ta optenibel na tur punto di benta i riba caribbeanticketshop.com

 

Riba foto: sra. Sucena Hortencia (Murray Attorney At Law), Thakaidzwa Doran (Crowd Management), Michel Pascal (Sun Splash NL), Efrem Mambi (Decoded), Djiwan Gonesh (Massive Productions), Mitchel Poleon, Sergio Sankasting i Rugby Elmondalek di Unique Productions.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: