sr. Dennis Zulu, Kordinado Residente di Nashonnan Uni a hasi un bishita di kortesia na Servisio Meteorológiko Kòrsou.

Awe, djabièrnè  30 di sèptèmber 2022, sr. Dennis Zulu, Kordinado Residente di Nashonnan Uni a hasi un bishita di kortesia na Servisio Meteorológiko Kòrsou.

 

Sr. Zulu tin su sede na Trinidad i ta e Coordinador Residente di Nashonnan Uni, kual ta e representante di rango  más haltu di e Sistema pa Desaroyo di Nashonnan Uni riba nivel di País. E Kordinado Residente ta lidera e asina yama “Country Teams” i ta yuda ku e implementashon di e agenda 2030 pa desaroyo duradero.

Den kuadro di firmamentu di e akuerdo di koperashon nobo entre Kòrsou i Nashon Uni durante e siman di akshon pa SDGs, e tabata di bishita na Kòrsou pa sera konosí ku e diferente instansianan ku ta aktivo riba e tereno aki.

 

Manera ta konosí SDG 13 ta referí na akshonnan ku mester tuma den kuadro di kambio di klima. Servisio Meteorológiko ta e entidat di gobièrnu ku ta koördiná esaki huntu ku e komishon nashonal. Por indiká ku e aña aki gobièrnu a establesé un plataforma di kambio di klima pa Kòrsou ku Servisio Meteorológiko ta presidí. Sr Zulu despues di a haña un presentashon relashoná ku e plataforma a opsekiá sr. Martis un pin ku ta simbolisa e metanan pa desaroyo duradero.

Naturalmente tabata importante pa sr. Zulu tambe mira kon Servisio Meteorológiko ta hasi e trabou operashonal pa duna informashon na aeropuerto, sektor marino i públiko pa protekshon kontra wer severo.

Sr. Zulu a keda masha satisfecho i a yama danki na e tim di maneho di Meteo pa nan bon trabou ku ta wòrdu desplegá relashoná ku SDG.

Riba potrèt: Sr. Dennis Zulu huntu ku Sr. Albert Martis Hefe di Meteo na Servisio Meteorológiko