Rich Kalash

NA MI FANATIKO NAN
Mi ta lamentá i desapuntá di mester anunsiá ku mi presentashon di dia 27 di òktober 2022 na Lorret de Mar, Spaña a keda kanselá pa motibunan fuera di mi alkanse.

Ya pa algun aña kaba mi ta luchando kontra un situashon kaminda persona nan deskonosí ta tratando di blòkiami den mi trabou, mihó bisá den mi arte.

Na momentu ku anunsiá ku Rich Kalash lo forma parti di kualkier evento, deskonosído nan ta yama autoridat, aserká promotor di fiesta, doño di lokashon i seá manasá nan òf ku hopi preshon konvensé nan ku pa motibu di menasa nan rondo di mi persona, ami na mi turno ta forma un riesgo pa e evento i seguridat di bishitante nan.

E situashon menshoná a kuminsá riba mi propio isla, ku tempu ela afektá presentashon nan riba nos hermana isla nan, na Hulanda i awor hasta na Spaña.

Informashon a bini awe for di Spaña ku e doño di e lokashon kaminda e presentashon lo mester a bai tumá lugá a indiká ku e ta hañe obligá di kanselá mi presentashon, pa motibu di informashon nan ku a yega na su persona ku mi presensia lo forma un riesgo pa e evento i bishitante nan.

Ami ku a pasa den i ta konosí ku e situashon aki kaba sa ku e informashon nan aki ta falsu.

Lo mi ta gaña si mi bisa ku mi no ta kansá di e situashon menshoná. Na kada un persona ku a yega di presensiá un di mi presentashon nan, boso nan sa ku mi ta presentá ku kurason i alma. Mi ta hasi e lokual ku mi ta hasi aki ku hopi pashon i amor. Pues kadabes ku kanselá un presentashon pa kuakier motibu, ta un desapunto pa boso nan ku ta fanatiko pero tambe pa ami ku ke kumpli ku bosonan manera bosonan semper a kumpli ku ami. Nos ta un ‘team’ i nos ta komparti e desapunto nan aki huntu.

E situashon aki ta espesialmente frustranté komo ku semper mi presentashon nan a bai manera mester bai, semper mi a kumpli ku mi publiko i nan ku ami.

Mi ta lamentá di mester kompartí e notisia aki ku tur hende ku a spera di mira Rich Kalash riba esenario dia 27 aki na Spaña.

Na mi fanatiko nan: sa ku mi ta keda fiel na boso nan manera semper boso nan a keda fiel na ami.