GRAN FINAL DI LIGA MCB PROMÉ DIVISHON 2021-2022! JONG HOLLAND LO TOPA JONG COLOMBIA DJADUMINGU 30 DI ÒKTOBER, 6’OR DI ATARDI DEN STADION ERGILIO HATO!

GRAN FINAL DI LIGA MCB PROMÉ DIVISHON 2021-2022!

JONG HOLLAND LO TOPA JONG COLOMBIA DJADUMINGU 30 DI ÒKTOBER,

6’OR DI ATARDI DEN STADION ERGILIO HATO!

 

 

Liga MCB Promé Divishon su gran final lo tuma lugá djadumingu 30 di òktober, den Stadion Ergilio Hato pa 6’or di atardi. E dos ekiponan ku lo mira akshon durante e gran final di Liga MCB Promé Divishon ta Jong Holland i Jong Colombia.

Un tabla lo bula den Stadion Ergilio Hato djadumingu ora Jong Holland bin tur ku tin pa defendé su título di kampion miéntras Jong Colombia tambe ta bin pa kue e título máksimo despues ku 15 aña pasá nan tabata den un final di Promé Divishon!

 

Liga MCB a wòrdu dediká na e siguiente baluartenan; Sr.Rignald Hato (èks hungadó/kolaboradó di FFK), Sr.Etiënne Siliee (tékniko), Sr.Malfried Sabina (èks rèfri), Sr.Erwin ‘Bazjòt’ Godfried (eks hungadó), Sr.Wilson Sommer (dirigente), Sr.Rignald ‘Bayena’ Clemencia (èks hungadó), i Sr.Robert ‘Robby’ Vicario (èks hungadó/masagista). E pèrsonanan aki ta tin un kontribushon enorme na e desaroyo di e deporte rei, futbòl. P’esei nan a keda homenahiá i FFK a dediká e kampionato di e aña aki na nan.

 

Entrada pa final di Liga MCB Promé Divishon ta kosta fl 12.50,- pa adulto miéntras mucha di 6 te ku 12 aña i 60+ ta paga solamente fl. 5,-. Karchinan lo ta optenibel djadumingu dia di wega for di 12’or di mèrdia na e lokètnan di Stadion Ergilio Hato!

Portanan ta habri for di mitar di 5 di atardi, yega trempan pa evitá e tráfiko.

 

Animashon musikal lo ta na enkargo di GRIK i mas ku klaro nos lo repartí diferente premio di porta durante e enkuentro! Pueblo di Kòrsou ta keda kordialmente invitá pa bin na bòshi, bin apoyá bo ekipo preferí i disfrutá ku bo famia di e deporte rei, futbòl!

 

MCB i FFK ta wardabo na e gran final di Liga MCB Promé Divishon!

 

26 òktober 2022

 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: