Tabatin mester di un vupá garafal di Minister-President pa kuminsa sanea CMC!

Tabatin mester di un vupá garafal di Minister-President pa kuminsa sanea CMC!

 

Despues di bin bei di gobièrnu su rueda di prensa PIN a keda babuká ku ta awó numa e gobièrnu ku tin kasi un aña i mei sintá, tei kuminsa traha un ‘roadmap’ pa haña informashon pa kon atendé ku e situashon di CMC. Danki na e vupá di Minister-President di djasabra último, ku sikiera esaki lo bai subi mesa! No hay mal que por bien no venga.

 

Rapòrt Taskforce Marktordening en Financiering Zorgsector

Manera e eksperto dr. Caryl Monte a indiká den e rueda di prensa, for di 2018 a konstatá huntu ku Cft ku e gastunan di operashon di CMC ta bai ta sigur un 60 of 70 mion mas pa aña kompará ku Sehos. Riba enkargo di Minister Römer den Gabinete Ruggenaath, Taskforce Marktordening en Financiering Zorgsector, ku na kabes dr. Monte, den un rapòrt di mart 2019 a formulá medidanan pa baha gastu den e kadena di salubridat pa por finansiá presupuesto di CMC. A rekomendá pa wak e gastunan di remedi, spesialista i di manda hende afó pa kuido médiko. Na 2019-2020 a tuma e medidanan proponé, ma ora e pandemia di Covid a dal aden, kos a wanta.

 

Kiko a sosodé último dos aña i mei ku e maneho di gobièrnu di e kadena di salú?

Eks-minister Römer a sali fo’i gobièrnu riba 24 di yüli 2020. Apenas nuebe luna despues ku CMC a habri, lagando den CMC un grupo di trabou independiente pa haña informashon finansierio kontinuamente i vigilá  na tempu pa por yega na mihó bista i mihó kalkulashon di gastu i presupuesto. Sra. Römer a tuma e medidanan konkreto basa riba e Rapòrt Taskforc esta rapòrt Monte pa por finansiá presupuesto di CMC. Kiko a sosodé después pa ku CMC su desaroyo di gastu i medidanan na nivel di pais? Kiko a sosodé entre 24 juli 2020 pa 27 di òktober 2022, pues den e último 2 aña i mei?

 

Segun gobièrnu CMC tin un pèrdida aworaki di 1 mion pa siman, kemen pa tèrkedat di kabinete Pisas pa no atendé ku CMC e pérdida a subi ku sigur 60 mion!

Den e ‘Landspakket’ a palabrá un trayekto di ‘verduurzaming’ di CMC ku según gobiernu na e momentu aki ta pèrdè 50 pa 55 mion pa aña, esta 1 mion florin pa siman. Pa analisá e situashon i posibel solushonnan gobièrnu a nombra un “regiegroep” ku mes un dr. Monte na kabes. Mientrastantu pa terkedat, pa no kièr atendé ku CMC, den e 60 simannan ku gabinete Pisas tin sintá nos a pèrdè 60 mion florin, esta 1 mion pa siman.

 

Hoofdlijnenakkoord- Akuerdo global

Dor di e bochincha kousá pa Minister-President su vupá di marka mayó, por fin gobièrnu a hañe ta instalá diferente komishon pa analisá NZa su rapòrt i disidí si e ta sigui e rekomendashonnan si òf no. E análisis entre BTP, SVB i GMN den konsulta ku CMC lo tuma luga te 31 di òktober.

Remarkabel ta ku ta for di 16 di sèptèmber gobièrnu tin NZa su rapòrt kompletu. Antu pa kolmo gobièrnu su puntonan di análisis no ta bai mas leu ku investigá listanan di espera, pasa den relatonan anual pa un bista finansiero, ouditoria di efisiensia i revishon di e gastunan pa Covid den e periodo 2020– 2021. Banda di esei lo wak gastunan di indokumentado, mediashon entre ADC i CMC. Vastgoed tambe lo partisipá na e kòmbersashonnan.

 

Gòbiernu tin algu di bisa den CMC?

Por último, segun eksperto Monte, riba e diskushon di i gobièrnu tin algu di bisa den CMC, tur e akshonnan aki ta prueba práktiko ku gobièrnu sigur tin di bisa den CMC i a yega na palabrashon konkreto den 14 área.

 

Gobièrnu mes a rekonosé su inkapasidat

E rueda di prensa a desepshoná tur ku a spera di haña informashon konktreto di gobiernu su medidanan pa solushoné e problemanan di CMC i e kadena di kuido riba término kòrtiku. Gobièrnu a indiká ku ta awor numa e ta bai hasi su inventarisashon pa informá su mes bon. Kemen gobièrnu a sinta for di 10 yüni 2021, esta durante kasi un aña i mei, i den tur e tempu ei no a hasi nada, ma nèt nada pa e hospital i e sobra kadena di kuido kuta den roblemanan similar.

 

Último konklushon

Manera un periodista a trese dilanti e gobièrnu aki ta humiyá hende i ta desprestigia su kabinete i pais. Minister-President ta rekonosé ku tin minister emoshonal riba Facebook i a bisa ku e ta bai atendé ku nan.  Ban weta!

 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: