Siman empresarial GEW a kuminsá ku partisipashon di vários partner i un programa hopi variá

 

Siman empresarial GEW a kuminsá ku partisipashon di vários partner i un programa hopi variá

WILLEMSTAD – Djaluna mainta e tim organisadó  di Global Entrepreneurship Week (GEW) Curacao , huntu ku su partnernan a duna inisio na e ‘ siman’ den kua mundu ta selebrá i tira lus riba e emprendedó.  GEW ta un inisiativa di e organisashon Global Entrepreneurship Network pa stimulá hasimentu di negoshi na e mas di dosshen pais afiliá na GEN. Na enkuentro, den forma di un desayuno, tabata presente representantenan di diferente partner di GEW Curacao, i komo invitado prinsipal Minister pa Desaroyo Ekonómiko i Turismo, sr. Ruisandro Cijntje. Despues di un diskurso di apertura di presidente di Fundashon Negoshi Pikina, ku for di 2014 tin e lisensia pa organisa GEW na e islanan di Dutch Caribbean, Minister Cijntje a hiba palabra mustrando riba e importansia di e ‘entrepreneur’ komo inovadó, kreadó di kupo di trabou, i su importansia pa ekonomia en general.

Entre partnernan presente por a tuma nota di partnernan di GEW for di su inisio, manera entre otro MCB i MEO, pero tambe partnernan nobo manera Guardian Fatum, Qredits, Extura i vários otro organisashon ku a kere den GEW Curacao for di su inisio i tambe partnernan ku e aña aki a uni nan mes pa promé biaha na GEW Curacao, i a duna nan su sosten den diferente forma.

Banda di oumento di partner por hasi menshon tambe di oumento di aktividat i variashon di aktividat ku ta kubri Kòrsou dor di Westpunt te Fuik. Tambe por a tuma nota ku e aktividatnan a inisiá ya vários siman promé ku e ‘siman’ ofisial i tambe ku ta sigui e siman despues di e siman ofisial di GEW. Sra. Pieternella a splika ku e aktividatnan a krese ku añanan di forma ku no por a hinka tur den un siman.  Un invitashon a bai di parti di e komité organisadó pa bishita e website www.gewcuracao.com i páginanan di Facebook i Instagram di GewCuracao pa ta al tantu di tur informashon.

Durante di e mainta tabatin alabes un presentashon virtual for di Trinidad na enkargo di sr. Ernest Ross, asistí físiko na Kòrsou, pa su kompañero Chester Parris, di e agensia inovativo, Ross – Rethink, , ku tin operashon na vários pais den Karibe. Esaki komo un inisiativa di GEW Curacao pa fortifiká laso ku paisnan den nos region. Relashonista publiko di GEW Curacao, Farley Lourens,  na su turno a bisa ku e tim organisadó ta hopi satisfecho kon e apertura ofisial a bai i ku nan ta wak dilanti ku hopi entusiasmo na e aktividatnan ku lo sigui riba kua nan, i nan partnernan a bin ta traha intenso riba dje pa vários luna.

 

 

 

 

 

 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: