Paisnan di Latino Amérika i Karibe a aprobá e Deklarashon di Santo Domingo “Na kaminda pa un Inteligensia Artifisial Étiko, Responsabel i Produktivo pa e Desaroyo Duradero di América Latina i Karibe” i e Mapa di Ruta 2026-2027.

Paisnan di Latino Amérika i Karibe a aprobá e Deklarashon di Santo Domingo “Na kaminda pa un Inteligensia Artifisial Étiko, Responsabel i Produktivo pa e Desaroyo Duradero di América Latina i Karibe” i e Mapa di Ruta 2026-2027.

 

Willemstad. Durante e di tres Kumbre Ministerial i di Outoridatnan Haltu riba Étika di Inteligensia Artifisial na Amérika Latina i di Karibe, paisnan Latino Amérika i Karibe a aprobá e Deklarashon di Santo Domingo “Na kaminda pa un Inteligensia Artifisial Étiko, Responsabel i Produktivo pa e Desaroyo Duradero di América Latina i Karibe” i su Mapa di Ruta 2026-2027.

 

E Kumbre a duna kontinuashon na e kompromisonan asumí na Santiago di Chile (2023) i Montevideo (2024), profundisando e trabou di e Grupo di Trabou Regional riba IA, kreá despues di e promé edishon i koordiná ku apoyo di CAF– banko di desaroyo di America Latina i Karibe i UNESCO.  

 

E Deklarashon ta re-afirmá e kompromiso di e region pa loke ta trata e desaroyo i implementashon di e parti étiko di Inteligensia Artifisial (IA), rekonosimentu di e progresonan realisá di e dos kumbrenan anterior.

E enkuentro di haltu nivel akí, a tuma lugá 25 i 26 di yüni 2026 na Santo Domingo, Repúblika Dominikano, tabata organisá pa Ofisina Gubernamental di Teknologianan di Informashon i Komunikashon (OGTIC) di Repúblika Dominikano, CAF i UNESCO. 

 

Durante e seshonnan, a trata entre otro tópikonan klave manera e sistema di lei, regulashon, práktika i prosesonan di IA, protekshon di derechonan humano, aplikashon di IA pa desaroyo duradero, i strategianan inklusivo ku ta tene kuenta ku e realidatnan teknológiko i sosial di Amérika Latina i Karibe.

 

E aña akí, e reunion a konta ku partisipashon di lidernan gubernamental, ekspertonan internashonal, representantenan di sektor privá, sosiedat sivil i organismonan multilateral, ku e meta di fortifiká koperashon regional i sigui avansando den implementashon di polítika públiko aliniá ku e Rekomendashon di UNESCO riba étika di Inteligensia Artifisial.

 

Kòrsou a partisipá for di prinsipio na e enkuentronan akí i ta forma parti di e sub-grupo di trabou ku a traha riba e Mapa di Ruta (Roadmap) ku paisnan presente,  ku ta bai kubri  añanan 2026-2027. Pa 2026-2027 Kòrsou ta forma parti un biaha mas di e sub-grupo di trabou riba sistema di lei, regulashon, práktika i prosesonan.

 

Paisnan ku a kaba nan “Readiness Assessment Methodology” (RAM), manera Kòrsou a haña un invitashon spesífiko, pa forma parti di e mesa rondó pa informá riba e último desaroyonan despues di a kaba e RAM. 

Sekretario General di Ministerio di ESKD Sra. Susan Larmonie van Heydoorn a duna un breve presentashon riba proseso di implementashon di RAM i pasonan ku tin ku sigui pa loke ta trata Kòrsou. 

 

Athuntu 2 foto di e reunion di Alto funshonarionan