Apertura temporada di Karnaval di Kòrsou 2023 dia 7 di Janüari 2023

WILLEMSTAD – 6 di Dezèmber 2022 – Durante un enkuentro ku prensa, Fundashon Desaroyo Karnaval Kòrsou (FDKK) a presenta nan magno evento di Apertura di temporada di Karnaval 2023, kual ta programá pa djasabra 7 di janüari 2023.

FDKK ta planiando un apertura di temporada, kual lo ta un espektakulo ku Kòrsou ahinda no a yega di konose. Un konsepto nobo, karnavalesko, kolorido i úniko, kaminda lo resaltá e aspekto ku tin den kayanan di Otrobanda durante marcha di Nos Karnaval.

Curaçao Festival Center lo wòrdu transforma den un arena kaminda e ruta di Karnaval lo ta sentral huntu ku e grupo nan di karnaval i otro parti nan integral, ku huntu ta forma e ambiente total ku nos stima di Nos Karnaval.

FDKK lo krea un “Ban topa Karnavalesko”, mane nos konose promé ku e marcha jega.
Lo por gosa plenamente di e totalidat for di e stèlage nan segun ku e marcha ta pasa, después pa baha abou i djòin e ambiente mane ta den kaya més bo ta. E “Karnaval Dome” tambe lo wòrdu krea komo un parti popular di e totalidat pa por eksperensia e evento aki riba ritmo di agrupashonan popular musikal ku artistanan invita pa re-produsí e lokura di Karnaval di Kòrsou.

Un serie di agrupashon nan, manera Grupo Grik, Doble R puru, Icons, ONE, Allure, Jaystaxx/Don T i tambe Axel Karnaval All Stars lo perkura pa e ambiente di Karnaval riba e dia festivo di 7 di janüari, huntu ku Rei di Tumba i Rei di Tumba Hubenil for di 5or di atardi. Agrupashon ERA selebrando nan 40 aña den faradnula lo tin un presentashon spesial di karnaval pa e dia aki.

Aki nos lo por haña un impreshon di loke por antisipa pa Apertura di temporada di Karnaval: https://www.youtube.com/watch?v=jmD0oEmUBEk

Gruponan di Karnaval ku ja konfirmá nan partisipashon ta Dushi Aventura, Vice Versa, Viva, Grupo Zjangilea, Estreno Mas Pikete, Hats of to Dreams, Youth Generation, Climax, I Love Hip Hop, Mi Grupo, Bo Zjilea i Le PLaisier d’ Life. FDKK ta invita mas grupo pa partisipa ku nos na evento aki, dor di tuma kontakto ku Nathan na +5999-692.1669.

Entrada pa e selebrashon di Apertura di Temporada di Karnaval lo ta na benta djabierne dia 9 di dezèmber na Mensing caminada, 24 uur uit de muur I tambe na Ofisina di Nos Karnaval den Sambil. Karchi pa “Den Kaya” ta kosta Naf. 25,00 (early birds). “Den Dome” ta kosta Naf. 150,00 (inklui 3 bebida + 1 sopi + 1 pan ku stoba).

FDKK ta honra ku e oportunidat di por organisa Nos Karnaval di Kòrsou 2023.
Felis Karnaval!

Share this page to Telegram

This site uses Akismet to reduce spam. Learn how your comment data is processed.

%d bloggers like this: