DIA INTERNASHONAL DI AVIASHON SIVIL

MINISTERIO KONSERNÍ TRÁFIKO, TRANSPORTE I PLANIFIKASHON URBANO

 

DIA INTERNASHONAL DI AVIASHON SIVIL

PUBLIKÁ RIBA 07 DESÈMBER 2022

Willemstad – Awe 7 di dèsember 2022 ta Dia Internashonal di Aviashon Sivil. Minister Charles Cooper ta felisitá tur ku ta laborá den e sektor di aviashon sivil aki na Kòrsou, i spesialmente tur empleado di Outoridat di Aviashon Sivil di Kòrsou (CCAA) awe riba Dia Internashonal di Aviashon Sivil. Danki pa boso esfuerso diario!

Tur aña, e Organisashon Internashonal di Aviashon Sivil (ICAO) ta para ketu i selebrá Dia Internashonal di Aviashon Sivil. Tema di e aña aki ta: “Advancing Innovation for Global Aviation Development”.

Pa Kòrsou komo un isla karibense, aviashon sivil ta di sumo importansia. Nos por biahe bai diferente pais, pero tambe turistanan por yega Kòrsou pa disfrutá di nos dushi pais.

Durante 2022, tabata tin logronan konkreto riba e tereno di aviashon sivil. Algun di logronan mas importante ta entre otro introdukshon di e asina yama ‘Passenger Safety Oversight Charge’. E lei aki a pasa den Parlamentu di Kòrsou i ta trahando riba e tarifa i sistema pa kobra e ‘charge’ aki. Di e forma aki, por garantisá ku na un manera struktural, e inspektornan por keda al tantu ku e eksigenshanan ku nan mester (keda) kumpli kuné pa nan por ehersé nan trabou. Tambe tin un konsepto di lei pa e tarifa. Na e momentonan aki, tin konsultanan tumando lugá ku diferente ‘stakeholders’ pa yega na e tarifa pa e “charge”. Ta spera ku pa 2023 lo por introdusí e tarifa aki.

Un otro logro ta tambe diferente otro lei ku ta trahando riba nan, manera entre otro ‘Luchtvaartlandsverordening’, ‘Landsbesluit houdende algemene maatregelen ter uitvoering van Luchtvaartlandsverordening’, i e asina yama ‘ministeriële regelingen met algemene werking’, kaminda ku den e último leinan ta pone e eksigenshanan tékniko. Ta spera ku e leinan aki lo ta kla pa 2023.

Tambe, CCAA a risibí aprobashon pa por buska mas personal. Di e forma aki, nos ta aun mas serka pa Kòrsou bai bèk Kategoria 1. Nos tin mester di total 29 funshon, i ta sigui ku e buskeda pa personal kualifiká.

Minister Cooper, komo Minister enkargá ku aviashon sivil, ta enfatisá e importansia di aviashon sivil, i ta trahando pa Kòrsou kumpli ku tur stèndert internashonal di tantu ICAO komo di e Federashon di Aviashon Merikano (FAA).

Share this page to Telegram

This site uses Akismet to reduce spam. Learn how your comment data is processed.

%d bloggers like this: