RDK I CRU NO TA PARTIDO DEN TRANSAKSHON PA PRODUKTONAN ALMASENÁ NA BULLENBAAI

DEKLARASHON

RDK I CRU NO TA PARTIDO DEN TRANSAKSHON PA PRODUKTONAN ALMASENÁ NA BULLENBAAI

Willemstad – 3 di yanuari 2023 En bista di publikashonnan eroneo ku a bin ta sali, Refineria di Kòrsou (RdK) ta duna un splikashon aklaratorio tokante su akuerdo ku e tin ku Caribbean Petroleum Refinery (CPR) pa loke ta almasenahe di produkto den e tankinan di su subsidiario Curaçao Refinery Utilities (CRU) na Bullenbaai.

Ya pa algun tempu CRU ta buskando partidonan pa almasená produkto petrolero den e tankinan na Bullenbaai. Di e forma aki ta generá entrada pa kubri e gastunan ku e fasilidat ta trese kuné. RdK i CRU ta hasi un ‘due dilligence’ promé ku drenta un akuerdo ku un partido pa asina sa ken e kliente ta. Esaki a tuma lugá debidamente den kaso di CPR.

 

Promé ku sera e akuerdo ku CPR pa almasená produkto petrolero, CRU a puntra CPR si e produktonan petrolero aki ta sankshoná pa Merka. CPR a kontestá por eskrito ku esaki no tabata e kaso. Na momentu ku a sali publikashonnan kontrario na esaki, CRU a pidi CPR un opinion legal independiente. A base di e opinion legal di parti di un ofisina hurídiko Merikano a resultá ku no tabatin violashon di e sankshonnan Merikano.

 

RdK i CRU no ta envolví den kompra di e produktonan petrolero aki for di PDVSA òf Venezuela, ni tampoko ta envolví den atkisishon òf transakshon relashoná ku e kargamentu di e produktonan aki. Meskos, RdK i CRU lo no ta envolví den eventual bendementu òf rebendementu di e produktonan aki.

Ta bal pa enfatisá ku e trayekto entre RdK i CPR pa yega na un operadó nobo di refineria i Bullenbaai ta sigui kana di forma transparente i kouteloso, ku e meta firme pa firma e ‘Heads of Agreement’ mas pronto ku ta posibel.