Temporada di Karnaval di Kòrsou 2023, ofisialmente habrí!


FDKK a presenta un selebrashon di Apertura nunka bisto pa Kòrsou
den Curaçao Festival Center, Djasabra anochi.

 

WILLEMSTAD – 7 di janüari 2023 – Temporada di Karnaval 2023 a ranka sali riba un tono haltu djasabra anochi den Curaçao Festival Center den presensia di miles di Karnavalista nan, miembronan di prensa, músiko, mandatario nan i otro dignitario nan di Kòrsou.

Fundashon Desaroyo Karnaval Kòrsou (FDKK) a presenta un konsepto nobo, karnavalesko i úniko,  simulando aspektonan ikóniko di Nos Karnaval; manera stèlazje nan, tribuna Dome i nos kayanan di Otrobanda durante marcha di Nos Karnaval, ku huntu ta forma e ambiente total ku nos stima di Nos Karnaval.

E selebrashon tabata un ekploshon musikal ku presentashon di Grupo Grik, Doble R puru, Allure, ONE, ICONS i ERA, Jaystaxx & Don T, Argenis Huerta mientras Axel All Star Band a klousura e anochi ku un serie di nos íkono nan di Tumba lokal.

Un momento impaktante i memorabel durante e anochi, ta ora grupo nan di Karnaval a marcha riba ritmo di Tumba i Brassband BEM kids dor un un ‘kaya’ kreá den festival center, bou di goso i applouso di Karnavalista nan, enkabesa dor di Minister di ‘Cey’ van Heydoorn akompaña pa Reina, Rei i Prins ku Pancho di mucha, tiner i adulto. Asta nos por a mira Parlamentario Djaoen-Genaro partisipe di e marcha tan kolorido i animá.

FDKK kier a gradisi partisipashon aktivo di Gruponan Hubenil: Moving dolls / Grupo Smile / Mi Grupo, Gruponan di Tiner: Climax Teens / Bo Zjilea / VSBO St Jozef / Caramileño, Gruponan di Adulto: Grupo Zjangilie / Vise Versa / Alegria i Kontentu / Viva / Estreno Carnival Group / Hats Off To Dreams / Dushi Aventura i tambe Johnjohn komo indivual.

Un danki spesial di kurason na partnernan i patrosinadornan di Apertura di Karnaval, kuerpo Polisial, Prensa i nos Kolaboradornan pa por hasi e evento aki un éksito.

Fundashon Desaroyo Karnaval Kòrsou (FDKK) ta desea pueblo di Kòrsou un felis Karnaval!

Share this page to Telegram

This site uses Akismet to reduce spam. Learn how your comment data is processed.

%d bloggers like this: