Moneda Konmemorativo di Willemstad Patrimonio Mundial
Willemstad/Philipsburg –Centrale Bank van Curaçao en Sint Maarten lo emití un moneda
konmemorativo di plata, di 5 florin, na honor di siudat di Willemstad, en bista di su di 25
aniversario komo Patrimonio Mundial. E área históriko di Willemstad ta riba lista di Patrimonio
Mundial di UNESCO for di 1997; bon motibu pa honra e kapital di Kòrsou ku un moneda
konmemorativo na 2023.
Willemstad ta un di e poko siudatnan designá komo Patrimonio Mundial pa motibu di nan balor
kultural i históriko universal. Algun di e karakterístikanan úniko di Willemstad ta su barionan
históriko, su diversidat kultural, su arkitektura urbano úniko i su mas di 700 monumentonan
kolorido. Nos siudat ta úniko tambe komo siudat portuario históriko den Karibe.
E moneda konmemorativo lo ser produsí pa Koninklijke Nederlandse Munt. E lo tin e mesun diseño
ku e moneda konmemorativo hulandes di kua Su Mahestat Rei Willem-Alexander a bati (imprimí)
su promé ehemplar awe aki na Kòrsou. Mirando ku emishon di e moneda ‘Willemstad’ ta na honor
di e monumentonan mundial importante di UNESCO ku tin na Kòrsou, a hasi un yamada públiko
na e diseñadó- i artistanan bibá na Kòrsou pa bini ku diseño di tantu e moneda di euro komo esun
di NAf. E diseño di e artista yu di Kòrsou Cleo Maxime de Brabander a sali ganadó. Riba su banda
dilanti, por mira Rei Willem-Alexander ku brùg Reina Juliana den fondo. Na e parti ariba tin kuater
strea, simbolisando e kuater paisnan ku ta forma Reino Hulandes: Kòrsou, Aruba, Sint Maarten i
Hulanda. Riba e banda patras, por mira un bista di siudat, ku e kuater barionan ku huntu ta forma
e Patrimonio Mundial di UNESCO: Punda, Otrobanda, Skalo i Pietermaai. Den e diseño, a inkorporá
diferente di e monumentonan mas importante, manera Handelskade, snoa Mikvé Israel-Emanuel,
Fort Amsterdam i e edifisio konosí komo ‘de Tempel’, ku ta marka kaminda e bario di Pietermaai ta
kuminsá.
Lo produsí e moneda na e nivel di kalidat mas haltu, konosí komo ‘Silver Proof’, i e lo bini den un
estuche ku su Sertifikado di Outentisidat. E edishon ta limitá na 350 moneda. Por lo demas, e
moneda ‘Willemstad’ lo sirbi komo medio legal di pago na Kòrsou i Sint Maarten, ku un balor
nominal di 5 florin. Esaki lo ta un di e ultimo monedanan konmemorativo emití na florin di Antia
Hulandes.
Benta lo kuminsá mas den transkurso di aña. Ora ta asina leu, lo anunsiá esei riba e medionan
sosial di CBCS i riba nos wèpsait: https://www.centralbank.cw/functions/banknotes-coins.
Willemstad, 2 di febrüari 2023
CENTRALE BANK VAN CURAÇAO EN SINT MAARTEN