Djaweps 2 di Febrüari 2023, Sra. Margy Bond, Kònsùl General di Merka a hasi un bishita di kortesia na Servisio Meteorológiko.

 

 

Manera ta konosí gobièrnu a establesé un plataforma nashonal pa koordiná tur e aspektonan ku tin di aber ku Kambio di Klima. Gobièrnu a nombra hefe di Servisio Meteorológiko pa dirigí e plataforma aki.

Den e kuadro aki e Kònsùl General di Merka a hasi un bishita di kortesia pa siña mas di e aserkamentu di Kòrsou relashoná ku e Plataforma, su plan di ruta, plan di implementashon i su aktividatnan.

Naturalmente tabata importante pa e Sra. Margy Bond tambe mira kon Servisio Meteorológiko ta hasi e trabou operashonal pa duna informashon na aeropuerto i públiko pa protekshon kontra wer severo. Mas aleu, a informá i gradisí e Kònsùl General pa e akuerdo di koperashon entre NWS di Merka i Meteo di Kòrsou pa hasi posibel ku tur dia tin 2 balòn di wer ta wòrdu lansá na Kòrsou (7:00 AM i 7:00 PM) pa asina analisá e atmósfera den nos region. E balònnan aki ta wòrdu kumprá ku fondonan di Merka i mandá Kòrsou.

 

Kònsùl General di Merka, Sra Margy Bond a keda masha satisfecho i a yama danki na e team di maneho di Meteo pa nan bon trabou ku ta wòrdu desplegá relashoná ku Kambio di Klima i wer severo.

 

 

 

 

Riba potrèt: Kosul General di Merka, Sra Margy Bond. huntu ku Sr. Albert Martis Hefe di Meteo Korsou.