NOS SELEKSHON NASHONAL MASKULINO U-17 LO TA BÈK DESPUES DI A PARTISIPÁ NA E CONCACAF UNDER 17 CHAMPIONSHIP KU A TUMA LUGÁ NA GUATEMALA!

Nos selekshon nashonal kategoria U-17 ku a representá Kòrsou durante e CONCACAF U-17 Championship aya na Guatemala lo regresá djadumingu 19 di febrüari 2023. Esaki despues di a keda eliminá for di e kampionato aki. Awe ‘nochi nos selekshon lo biaha di Guatemala pa Repúblika Dominikana kaminda nan lo keda algun dia pa partisipá na un partido amistoso ku un tim lokal, pa despues biaha pa Kòrsou.

 

Nos selekshon ta forma parti di grupo E i a enfrentá Mexico, Panama i e pais anfitrion, Guatemala. Durante nos promé partido ku a tuma lugá dia 11 febrüari kontra Mexico, nos a kai vensí ku skor di 9-0. Seguidamente nos a topa Panama dia 13 di febrüari kaminda nos a pèrdè ku skor di 4-0 i por último nos a enfrentá Guatemala dia 15 febrüari 2023 kaminda nos a kai vensí ku kor di 8-3. E golnan di e partido aki a keda anotá pa Giandro Sambo ku Luigi Inesia i nos a risibí un outogol na man di Guatemala. Lastimamente nos no a logra un viktoria durante e torneo aki i a keda eliminá.

 

Nos selekshon a wòrdu dirigí pa sr. Demy Rosario ku a wòrdu asistí pa sr. Rowendy Sumter komo entrenadó di portero. Sr. Ebenezer Lourentz tabata e masahista miéntras dòkter Ramfis Fillet tambe a kompañá e selekshon i sr. Oliver Windster tabata esun enkargá ku e materialnan di nos selekshon. Nos direktor tékniko sr. Dean Gorré i e ofisial di prensa sr. Rogier Schultz tambe a biaha ku e selekshon i e hefe di delegashon tabata sr. Remfis Donker, miembro di direktiva di FFK.

 

E siguiente hungadónan a forma parti di nos selekshon;

 

1          Irdjoailly Emelina (Atletiko Saliña)

2          Declan Kleiboer (v.v. Hoogstraten)

3          Rochendrick Mathilda (Inter Willemstad)

4          Dayshawn Isabella (New Song)

5          Noah Calister (Atletiko Saliña)

6          Shuvienchelo Hooi (Vesta)

7          Giandro Sambo (Ajax)

8          Luigi Inesia (New Song)

9          Carlos Seintje (Feyenoord)

10        Demiane Agustien (Derby County)

11        Gediel Vicento (New Song)

12        Quishurean Jourdain (C-Stars United)

13        Tarino Marchena (Inter Willemstad)

14        Cristian Pop (Subt)

15        Shermayn Rombley (Subt)

16        Darwin Lourens (Subt)

17        Jeandino Windster (Victory Boys)

18        Sebastian van Woerkom Mejias (Inter Willemstad)

19        Patrick Hook (Atletiko Saliña)

20        Kevin Hato (Subt)

FFK ta gradisí nos selekshon nashonal pa a representá nos isla durante e torneo aki i ta enkurashá tur nos hungadónan pa sigui hasi nan máksimo esfuerso, siña di e eksperiensia aki pa otro biaha bai mas mihó.

 

16 febrüari 2023