PROMÉ MINISTER SR. GILMAR PISAS A RISIBÍ EMBAHADOR DI MERKA PA HULANDA

 

 

Willemstad – Promé Minister sr. Gilmar Pisas a risibí Embahador di Merka pa Hulanda, sra. Shefali Razdan Duggal dia 23 di febrüari 2023.

 

Durante di e bishita di kortesia aki tabata presente e Kònsul General di Merka pa Kòrsou, sra. Margy Bond, i representantenan di Ministerio di Relashonnan Eksterior di Merka (State Deparment) i Ministerio di Hustisia i Direktorado di Relashonnan Eksterior (DBB) di Kòrsou.

 

Embahador sra. Razdan Duggal a hasi un bishita di 4 dia na Kòrsou i durante di e dianan aki e la hiba kombersashonnan ku diferente entidat lokal, pa asina será konosí mihó ku e posibilidatnan ku Kòrsou tin pa ofresé.

 

E kombersashon ku Embahador sra. Razdan Duggal tabatin ku Promé Minister sr. Pisas tabata unu masha ameno i fruktífero, kaminda a toka diferente tema di interés pa ambos país.

Entre e temanan ku a diskutí por menshoná trafikashon humano i Refineria.

 

Na final di e bishita Promé Minister sr. Pisas a gradisí Embahador sra. Razdan Duggal pa su bishita i a hasi entrega di un buki na dje.