DIA DI IDIOMA MATERNO 2023

Dia di Idioma Materno 2023 dediká na Rignald Sylvestre Recordino

WILLEMSTAD – En konekshon ku Dia Internashonal di Idioma Materno UNESCO CURACAO, Fundashon STRIPAN i Ministerio di Enseñansa, Kultura, Siensia i Deporte ta enfoká e ilustre outor i kompositor di Kòrsou señor Rignald Sylvestre Recordino. Señor R. Recordino ta outor di mas ku 500 komposishon dediká na Kòrsou i e suidadano di Kòrsou. Kansionnan kaminda e ta musikalisá kuenta kòrtiku, poema romántiko i profundisá tradishon oral di e kultura riku di Kòrsou.

Serka señor Rignald Recordino e mensahe ta sentral den su obranan. E lokual e ke bisa nos, siña nos, eduká nos semper tin un mensahe. E a i ta promové papiamentu i na hopi okashon durante mei siglo, laga nos saboriá e tesoro ku nos tin na dicho, proverbio, ekspreshon, kuenta, historia, fábula, charada, chiste, mito i leyenda. Tur esaki mesklá den un sous sabroso di nos ritmonan di kuna manera entre otro wals, dansa, dansa korí, mazurka, tumba, tambú, seú, salsa antiano, merengue, pambiche, bomba i montuno kurasoleño i vários ritmo kombiná.

Manera un ebanista e ta laga rima yanga den su obranan. Su spesialismo ta kuenta bibu, kaminda por mira e suseso ku e ta deskribí tuma lugá den bo imaginashon. El a uza su músika, batería i ritmo kaprichoso pa sasoná i karga su obranan. Ta p’esei su mensahenan semper ta yega. Ku su obranan di kurason el a yuda bringa e krísis di identidat ku Kòrsou ta biba den. Alabes el a promové patriotismo i halsa interes di e suidadano di Kòrsou pa su idioma materno papiamentu.

Ta pa e motibunan akí UNESCO CURACAO, Fundashon STRIPAN i Ministerio di Enseñansa,, Kultura Siensia i Deporte ta dediká Dia Internashonal di Idioma Materno 2023 na e genio musikal señor Rignald Recordino.

E oradó prinsipal di e anochi solemne akí ta e konosido kulturista i antropólogo kultural mr. dr. René Rosalia kende lo presentá un antologia di obranan di señor Recordino. E fiesta di papiamentu ta tuma lugá djaweps dia 2 di mart den oula di Universidat di Kòrsou Dr. Frumencio Da Costa Gomez. E seremonia ta kuminsá eksaktamente 7’or pm i ta terminá 10’or pm. Na final lo tin un ratu ameno riba e patio. Lástimamente e sala di e oula grandi di Universidat a yena pa motibu di e gran kantidat di interesado. Mediante “live steaming” tur esnan ku ta interesá por sigui e transmishon sin pèrdè niun detaye. E link pa bo mira i skucha e seremonia magno aki ta: https://livestream.com/accounts/5492271/events/10782568

Nos ta deseá tur esnan interesá un anochi agradabel, fruktífero i edukativo. Na e leyenda bibu, señor  Rignald Sylvestre Recordino, danki pa bo obra, na nòmber di pueblo di Kòrsou.

 —

MINISTERIO DI ENSEÑANSA, SIENSIA, KULTURA I DEPORTE

UNESCO CURAÇAO

FUNDASHON STRIPAN