MINISTER COOPER TA REUNÍ KU REPRESENTANTE PERMANENTE DI REINO HULANDES NA SWISA

Willemstad – Riba djabièrnè 24 di febrüari, Minister Cooper a reuní ku Representante Permanente (PV) di Reino Hulandes na Genève, Swisa.

Di parti di PV tabata presente:

• Embahador General, sr. Paul Bekkers,
• Minister Plenipotensario di PV na WTO, sr. Marcel Vermooij,
• sr. Robert in den Bosch, spesialmente enkargá ku asuntunan di des-armamento,
• sr. Roel van de Ven, promé sekretario, i
• sra. Famke de Kroon, enkargá ku asuntunan di sibernétiko.

Durante di e reunion, PV a splika nan trabounan. Nan ta representá diferente Minister di Reino Hulandes den Direktiva di tur e organisashonnan internashonal, i di Nashonnan Uní, ku ta establesé na Genève. Pues nan ta representá nos Ministernan di Kòrsou tambe.

Pa loke ta trata e kartera di Minister Cooper, a interkambiá tokante telekomunikashon, asuntunan postal, transporte, asuntunan sibernétiko, i kiko nan por nifiká konkretamente pa sirbi interes di Kòrsou na Genève den organisashonnan internashonal, i di Nashonnan Uní.

A palabrá ku, spesifikamento riba tereno sibernétiko, Sekretario General di VVRP sr. Puriel, i Hefe di Kabinèt di Minister Cooper,  sra. Pikerie lo tin un laso estrecho di trabou ku sra. de Kroon. Meta di esaki lo ta pa wak kiko ta e posibilidatnan pa na organisashonnan na Genève haña fondonan pa fortifiká nos trabounan.

Na final Minister Cooper a hasi entrega di un opsekio na sr. Paul Bekkers i a invit’é pa e bin Kòrsou próksimamente.