TRABOUNAN RIBA PERUWEG I NA ROTÒNDENAN HELMIN MAGNO WIELS BOULEVARD
MINISTERIO KONSERNÍ TRÁFIKO, TRANSPORTE I PLANIFIKASHON URBANO
PUBLIKÁ RIBA 26 FEBRÜARI 2023
Willemstad – Minister Charles Cooper huntu ku Servisio pa Obra Públiko (OW) ta anunsiá ku entrante djarason 1 di mart próksimo, lo bai hasi trabounan di mantenshon tantu riba Peruweg komo na 2 rotònde riba Helmin Magno Wiels Boulevard.
Den kuadro di e proyekto ‘Life Extension’ ku Minister Cooper a anunsiá, OW ta bai re-anudá trabounan riba Helmin Magno Wiels Boulevard. Ta traha riba e rotònde na Veeris i na Yòtin kòrtá. Tambe ta drecha parti di Peruweg ku ta den mal estado. Esaki lo kuminsá for di Hòfi Bil.
Lo tin 2 fase:
– Fase 1. Trabounan riba e rotònde provisorio na Veeris,
– Fase 2. Trabounan riba e rotònde provisorio na Yòtin kòrtá, i e parti di Peruweg ku ta den mal estado.
Kontratista Aliansa ta enkargá ku ehekushon di e trabou aki ku lo tin un durashon di aproksimadamente 4 siman. Orarionan di trabou lo ta di 7or di mainta pa 4or di atardi.
Lo desviá tráfiko riba Helmin Magno Wiels Boulevard. Lo bai tin barinan oraño i bòrchinan ku lo indiká esaki.
OW huntu ku Aliansa ta hasi un apelashon na tur outomobilista pa kore ku koutela.
