STICHTING ALZHEIMER DI BISHITA SERKA KONSEHO DI MINISTER

WILLEMSTAD – Riba djárason 1 di mart 2023, Konseho di Minister a risibí representantenan di Stichting Alzheimer Curaçao. Esaki a sosodé den kuadro di duna informashon tokante e fundashon i pa hasi kolèkte.

Durante di e enkuentro ameno a duna un presentashon tokante kiko Demensia/Alzheimer ta enserá, kua ta e síntomanan, ki tratamentu ta duna na pashèntnan ku e kondishon akí i kiko ta nifiká pa kuida un persona ku tin Demensia/Alzheimer (e peso di kuido). Meta prinsipal di Stichting Alzheimer Curaçao ta pa yuda halsa kalidat di bida di e persona ku ta sufri di Demensia/Alzheimer i tambe di su kuidadó.

Stichting Alzheimer Curaçao a keda fundá riba 1 di mart 2000. E fundashon ta konsistí di boluntarionan, den e kaso akí 7 miembro di direktiva i alrededor di 30 kolaboradó. E fundashon ta hasi vários aktividat. Entre otro ta duna informashon na komunidat via medionan di komunikashon i pa medio di un folleto, di manera ku por rekonosé e síntomanan i buska yudansa trempan. Tambe ta organisá kada 2 luna “Hofi Alzheimer”, un enkuentro informativo i sosial pa e persona ku demensia, su kuidadó i públiko en general. Riba petishon por duna charla tambe tokante e malesa na diferente instansia (klupnan di dama, empresanan, skolnan, institutonan di kuido etc.).