Minister Larmonie-Cecilia ta boga pa mas protekshon di mucha i hende muhé den medionan sosial.

Willemstad – E aña akí Nashonnan Uní tin komo tema den kuadro di ‘Dia Internashonal di Hende Muhé’ : ‘Un mundu digital pa nos tur. Inovashon i téknologia pa igualdat di género’.

Ministerio di Desaroyo Sosial, Labor i Bienestar tambe ta kontribuí na adelanto di nos hende muhénan riba e kaminda pa igualdat. Na Kòrsou tambe por mira ku tin un grupo, aunke chikí, di hende muhé ku ta aportá di forma signifikativo riba tereno di téknologia i inovashon.

 

Na 1975, Nashonnan Uní a proklamá 8 di mart komo ‘Dia Internashonal di Hende Muhé’. Riba e dia rònt mundu ta konmemorá i  selebrá adelanto i logronan di hende muhé. E aña aki Nashonnan Uní a skohe pa pone enfasis riba e nesesidat pa hasi teknológia i edukashon digital inklusivo i transformativo.

 

Ministerio di SOAW ta trahando riba diferente trayekto di formashon spesial pa hóbennan entre 18 pa 30 aña ku ta kobra ònderstant. E hóbennan aki lo haña formashon pa por subi merkado laboral. Lo pone enfasis entre  otro riba e parti di digitalisashon i abilidat pa lanta nan mes negoshi.

 

Nos ta konsiente ku ainda nos no a yega kaminda nos ke ta, esta pa garantisá ku hende muhé tin e mesun posibilidatnan pa desaroyo, edukashon i por hiba un bida liber di violensha den nos komunidat.

Nos por logra esaki dor di habri kaminda i krea kondishonan riba merkado laboral ku ta sostené e hende muhé den su desaroyo. Mester stimulá i duna akseso na mas mucha muhé i hende muhe den ente otro e areanan di digitalisahon i estudionan di siensia, téknologia, ingeneria i matemátika.

 

Lastimamente nos ta konstatá ku preokupashon ku hende muhé i mucha muhé en partikular, ta bira víktima di violensha i/o abuzu di género usando netamente medionan sosial i digital. E abuzu por ta den forma di entre otro intimidashon seksual, trafikashon, ‘sexting’ i pornografia forsá.

 

Mester pone atenshon speshal riba protekshon di hende muhé i mucha muhé  den espasionan digital, media sosial i téknologianan nobo di komunikashon.

Den kuadro di e maneho pa kombatí violensha relashonal i abuzu di mucha, ministerio di Desaroyo Sosial, Labor i Bienestar, lo tene kuenta tambe ku e aspekto akí di violensia di género.

 

Komo Minister di Desaroyo Sosial, Labor i Bienestar, mi ke enfatisá ku pa nos por sigui  krese sosial i ekonómikamente, nos mester krea e posibildatnan real pa tur hende muhé i tur otro grupo vulnerabel por partisipá den esaki. Netamente esaki ta un di e metanan primordial ku ta trahando ariba pa elevá e hende muhé den tur aspekto di su bida.

 

Mi ta felisitá tur hende muhé ku nos dia i aploudí boso trabou i tenasidat pa sigui bai dilanti. Ban pa un era kaminda e hende muhe ta lider den su propio bida pa e por bai dilanti den un ambiente di igualdat manera mester ta. Tuma tempu tur dia di nobo, duna bo mes un brasa di empoderashon.