Tópiko: deliberashon ku CMC

Presidente di Parlamento

Sra. C. America – Francisca

Wilheminaplein #4

Presente

 

Kòrsou, 10 di mart 2023

 

Tópiko: deliberashon ku CMC

 

Apresiabel presidente di Parlamento sra. America-Francisca,

 

Kuido di hospital ta un di e partinan importante di nos kadena di kuido. Komo úniko hospital ku ta ofresé kuido hospitalario general, CMC ta parti di nos sektor kolektivo. For di konstrukshon di CMC tabatin desishonnan ku a afektá e gastunan total di CMC, entre otro move e konstrukshon di Amstel pa Otrobanda. Ademas pa terminá e hospital tabatin gastunan imprevisto, manera e gastunan di transishon.

 

Esaki, huntu ku COVID, kuido pa in-dokumentado i un subida drástiko di e kantidat di pashènt di SVB ta hinka nos kuido hospitalario pa loke ta trata e parti finansiero den un situashon prekario i di atenshon. I frakshon di PAR ta usa NOS, paso e kuido, no ta di Gobièrnu, ni CMC e ta di i pa nos tur.

 

19 òktober 2022 gabinete Pisas a firma ku gerensia i direktiva di e entidatnan di CMC un ‘bestuurlijk hoofdlijnenakkoord sanering CMC entiteiten’ pa atendé ku e problemanan finansiero serio di CMC. Den kartanan di CMC fechá 23 di febrüari i 2 di mart 2023, gerensia di CMC ta trese dilanti ku no masha a sosodé pa loke ta trata e palabrashonnan ankrá den e akuerdo aki i ta indiká ku esaki lo kondusí na un paro di kuido elektivo.

 

Den karta fechá 8 di mart 2023, di Promé Minister sr. Pisas dirigí na CMC, ta keda tres’é dilanti  ku Gobièrnu di Kòrsou ta di opinion ku entidatnan di CMC a krusa un liña inakseptabel den nan kartanan i ta kuestioná ku e proseso pa saneá CMC lo por sigui kana di un forma konstruktivo. Lokual ta kondusí ku Gobièrnu, segun e karta di sr. Pisas, ta nombra un persona pa aprobá delantá tur gastu di CMC promé ku CMC haña e fondonan adishonal nesesario pa paga gastu di personal i gastunan di distribuidor di remedi i material di kuido. Segun e karta di Promé Minister den kaso ku CMC no aseptá e medida aki, lo rekurí na eliminá e pèrmit/’vergunning’ di CMC pa manehá un hospital.

 

Esaki sigur ta un direkshon indeseá pa ku nos kuido hospitalario. E echo so ku ta menasá pa kita e pèrmit pa operá un hospital for di e úniko hospital ku ta brinda kuido general ta for di tur proporshon. Pa e motibu aki, ta inminente ku Parlamento asumí su ròl di kontroladó di Gobièrnu i tende di tur dos partido. Frakshon di PAR ta skohe pa tende promé di CMC i seguidamente lo hasi un petishon pa un reunion públiko ku e minister responsabel pa salubridat sr. Silvania.

Pa medio di e karta aki suskritonan ta pidi Presidente di Parlamento pa yama reunion di komishon sentral a base di artíkulo 33 di nos reglamentu di òrdu. Kaminda ta invitá gerensia di CMC pa duna un presentashon di e situashon finansiero i kuido aktual.

Danki di antemano,

Miembronan di Parlamento, Partido Alternativa Real