Restrukturashon sektor Kuido di Salu Mental (GGZ)

Presidente di Parlamento

Sra. America Francisca

Wilhelminaplein #4

Presente

 

Kòrsou, 14 di mart 2023

 

Tópiko: Restrukturashon sektor Kuido di Salu Mental (GGZ)

 

Apresiabel sra. America-Francisca,

 

Kuido di Salú Mental ta un parti  importante i esensial den e sistema di kuido di salú general. Rònt mundu por a tuma nota ku nesesidat pa un sektor di salú mental efektivo, ku bista pa e kliente i finansieramente stabil ta krese. Mas i mas e siudadano ta haña porta pa e sektor di kuido aki.

 

Na aña 2018 e gabinete anterior a aprobá huntu ku e sektor un vishon pa ku Kuido di Salú Mental. Huntu ku e a vishon a pone tambe,  kiko ta e puntonan di atenshon pa alkansá e metanan formulá den e vishon. Tur esaki a keda ankrá den e dokumento “ Visiedocument Geestelijke Gezondheidzorg 2019-2023”. Na aña 2019 a enkaminá un trayekto pa reorganisashon di e sektor di Kuido di Salú Mental. Suskrito kier remarká ku e liña di tempu di e dokumento “ Visiedocument Geestelijke Gezondheidzorg 2019-2023”, ta finalisá e aña aki. Ta importante pa definí kontinuidat di esaki.

 

Suskrito ta konsiente ku e e temporada di COVID lo por a trese un retraso komprendibel den e ehekushon di e dokumento di vishon. Tambe ta rekonosé ku e  temporada di COVID aki, a hasi e tema di salú mental hopi mas relevante i urgente.

 

Den kuadro di loke ta menshoná ariba, suskrito tin algun pregunta na minister di SMN:

 

1. Pa kontinuidat di maneho ta importante pa Parlamento ta na altura si minister SMN lo sigui ku e maneho deskribí den e dokumento “ Visiedocument Geestelijke Gezondheidzorg 2019-2023”. Minister por konfirmá esaki?
2. Minister lo por duna Parlamento un relato di e estado di e plan di ehekushon? Minister lo por informá Parlamento kua ta e akshon konkreto ku lo tuma den e kuadro di e dokumento di vishon 2019 -2023, durante aña 2023? Minister por informá Parlamento si lo bai prolongá e dokumento di vishon 2019-2023? Sí, ta asina, ku kuantu tempu?
3. Minister lo por duna un bista aktualisá di e estado finansiero di tur entidat den e sektor di salú mental ku ta haña supsidio di Gobiernu òf tin un kontrato di kuido ku SVB?
4. Minister lo por informá Parlamento kua ta e ròl di ‘regiegroep’, den kuadro di e sektor di salú mental?

 

 

Mirando e urgensia i relevansia di e tema, suskrito ta pidi sra. Presidente por medio di artíkulo 96a pa yama un reunion di Momento pa Pregunta (vragenuur), kaminda ta invitá minister di SMN sr. Silvania.

 

 

 

Danki di antemano,

 

Ana Maria Pauletta

Miembro di Parlamento, Partido Alternativa Real