Nos penshonadonan no por keda desampará

Parlamentario pa frakshon di Trabou pa Kòrsou, sr. Rennox Calmes, a hasi un petishon pa reunion públiko den kuadro di e kaso di Ennia, Banko Sentral di Kòrsou i Sint Maarten i Gobièrnu di Kòrsou.

E meta di e reunion aki ta pa papia riba e kaso ku tabatin riba 16 di mart 2023, kaminda hues a órdena Ennia ku Banko Sentral pa yega na un akuerdo. TPK a bin komprondé ku e fondonan di penshun i e solvabilidat di Ennia ta na peliger i mirando e echo ku pueblo di Kòrsou tin eksperiensha ku e kaso di Girobank kaba, TPK ta premirá ku Gobièrnu di Kòrsou i Sint Maarten lo por haña nan tin ku bai inyektá sèn pa por garantisá solvabilidat di Ennia. Un otro motibu pa un reunion públiko riba e tema aki, ta ku e situashon aki sigur lo tin konsekuensha pa presupuesto di Kòrsou. Mas motibu pa e petishon pa e reunion públiko aki ta pa papia riba i sa kon a para ku e sistema di garantia di depósito (‘depositogarantiestelsel’).