TRABOUNAN RIBA HELMIN MAGNO WIELS TA AVANSÁ
MINISTERIO KONSERNÍ TRÁFIKO, TRANSPORTE I PLANIFIKASHON URBANO
PUBLIKÁ RIBA 20 MART 2023
Willemstad – Servisio pa Obra Públiko (OW) ta informá ku trabounan di asfaltamentu ta kontinuá riba Helmin Magno Wiels Boulevard.
Despues di a risibí varios keho, OW ta informá tambe ku tin palabrashonnan konkreto hasí ku e kontratista enkargá, esta ku por kuminsá sera kaya for di 8or di mainta. Riba djaluna 20 di mart, e kontratista a kuminsá mas trempan i esaki a kousa bastante konsternashon. OW a indiká na e kontratista ku nan no por kuminsá promé ku 8or. Tur esaki ku e meta pa minimalisá molèster pa outombilistanan ku ta trafiká den e área.
Den trankurso di e siman aki e siguiente trabounan ta planiá pa tuma lugá:
– lo asfaltá e rotònde na Veeris,
– e ròtonde na Yotin Kòrtá lo ta habri,
– kaba ku e trabounan na Yotin Kòrtá i Peruweg.
OW ta pidi su diskulpa pa e inkumbinensia ku e trabounan aki por kousa, i ta pidi djis un poko pasenshi mas mientras ku ta finalisá e trabounan na bienestar di komunidat.
