PIN ke sa si ta pa spetakel sr. Pisas i MFK tin sobrá di Kòrsou

Sin niun reakshon riba karta di GIK i sin yama reunión pidí pa 4 frakshon den parlamento, ‘doodleuk’ ta habri buskeda nobo pa un operador pa refineria Isla.

 

 

Willemstad — A deklará re-apertura di Isla prioridat nashonal. E operadó ku a skohé a defroudá nos pais. Grupo GIK, e di dos den fila, a bin dilanti sigurando ku e si por kumplí ku e kondishonnan i a akusá 2 minister di a aktuá  kontra di lei. Suidadanonan i Banko Sentral a entrega keho na Ministerio Públiko.  Gobièrnu MFK a keda ketu. Representantenan di pueblo a pidí reunion riba GIK su karta akusatorio, presidente di parlamento, miembro di MFK, tambe ta ketu meskos ku gobièrnu pa algun siman largu kaba. Pa koroná obra, sobrá di MFK su frakshon tambe ‘staat erbij en kijkt ernaar’.

Awor, ku kara labá, manera nada no a pasa, sin splikashon riba e kaso GIK, RdK ta anunsiá ku ta kanselá tur kos i ku tei start un proseso kompletamente nobo.

Ku tur esaki riba pantalla, Partido PIN mester puntra: ta pa spetakel sr. Pisas i MFK tin e pueblo di Kòrsou?

 

Inkrehibel

Pa medio di su representante, dr. Ruthsel Martha, Grupo GIK, despues di e debakel kompletamente evitabel ku CPR, ta insistí di si por ranka e proyekto inmediatamente. Partido PIN a pensa ku si di bèrdat re-apertura transparente di nos refineria ta prioridat, i ku si interesnan di pais ta riba tur kos, gobièrnu lo a sali i duna splikashon riba e ponensianan di GIK i habri kaminda pa diálogo.

Si e no a sali di su mes, PIN a pensa ku sikiera riba invitashon di parlamento, minister presidente Pisas lo a sali i duna klaridat riba e asuntu aki den staten, siendo e úniko plataforma adekuá konsiderando e interes nashonal. Sinembargo, e presidente di parlamento, kolega di partido di sr. Pisas, dundulando meskos ku ora a pidi klaridat riba e dokumentonan falsu di CPR, no a ni saka e konvokashon pa minister presidente bin splika e asuntu di GIK dilanti representashon di pueblo. Loke ta mas lamentabel ta ku e sobrá di MFK ta sinta wak man krusá kon famia i kontratistanan ta bai den perdishon.

 

Pregunta

Tur esaki ta pone Partido PIN puntra si ta pa spetakel  parlamento tin sobrá di Kòrsou. E koalishon aktual no ta kere ku e kuestion GIK meresé un splikashon promé ku habri un siguiente ronda pa buska operadó? Kasnan di famia i empresarionan kontratista no ta bal un splikashon? Partido MFK su direktiva i miembronan di frakshon no ta kere ku Kòrsou meresé mas rèspèt ku esei?

 

Si e koalishon aktual no ta sufisiente outokritiko pa eksigí un splikashon pa e pueblo ku e ta representá, orei Partido PIN lo ke konfia ku, na nòmber di kada siudadano, sikiera e di kuater poder demokrátiko, esta prensa, lo konvensé MFK i e gobièrnu aktual pa duna splikashon riba e asuntu GIK promé ku start un búskeda nobo di operadó pa Kòrsou su instalashonnan petrolero.