MINISTER COOPER TA ENTREGÁ PÈRMIT DI KONSTRUKSHON NA BAYSIDE DEVELOPMENT
MINISTERIO KONSERNÍ TRÁFIKO, TRANSPORTE I PLANIFIKASHON URBANO
PUBLIKÁ RIBA 20 MART 2023
Willemstad – Riba djaluna 20 di mart, Minister Charles Cooper huntu ku Servisio pa Planifikashon Urbano (ROP) a hasi entrega di un pèrmit di konstrukshon na Bayside Development B.V.. Esaki ta pa konstrukshon un apartèment/hotèl komo parti di e proyekto titulá ‘Epic at the Bay’ na Piscaderabaai.
E apartemènt/hotèl aki lo konsistí di 44 unidat di bibienda akompañá pa 44 luga di parkeo. Esaki lo rekerí un invershon mínimo di 22 mion florin.
Trabounan ta tuna lugá den diferente fase. E pèrmit di konstrukshon duná riba 20 di mart pa konstrukshon di e 44 unidatnan lo ta e promé fase di e proyekto ‘Epic at the Bay’. E di dos fase lo enserá konstrukshon di 8 villa aserka, pa despues sigui ku e di tres fase di 100 unidat di apartemènt/hotèl adishonal, i e último fase ta e ‘Epic Village’. Tur esaki total lo ta un invershon di un promedio di 130 mion florin.
E konstrukshonnan aki ta kontribuí komo un impulso ekonómiko grandi pa Kòrsou atraves di kuponan di trabou na momento di e konstrukshon, i durante di e fase di mantenshon.
Minister Charles Cooper ta kontentu ku e desaroyonan aki ya ku e ta ofresé pais un ‘boost’ ekonómiko.
