TUR KOS TA KLA PA NOS SELEKSHON FEMENINO U-20 SU PARTISIPASHON NA E CONCACAF UNDER 20 CHAMPIONSHIP! E DIA A YEGA!

Despues di basta luna di preparashon tur kos ta kla pa nos selekshon nashonal femenino kategoria U-20 su promé enkuentro durante e 2023 CONCACAF Women’s Under-20 Championship. E kampionato aki lo inisiá mañan 14 di aprel i ta kontinuá te ku 22 di aprel binidero i ta konta ku partisipashon di vários pais di kual pul B i pul D ta hunga aki na Kòrsou. Tur dia lo tin 2 partido, 3’or i 6’or di atardi den Stadion Rignaal ‘Jean’ Francisca. Entrada pa e partidonan aki ta kosta fl.5,- pa tur hende i por kumpra karchi for di 2’or di mèrdia na e lokètnan di stadion riba dia di wega.

 

Nos selekshon ta forma parti di pul B ku lo enfrentá Panama, Bahamas, Haiti i St. Maarten.

Nos promé partido lo tuma lugá mañan 14 di aprel kontra Panama, pa seguidamente nos topa Bahamas dia 18, Haiti dia 20 i por último St. Maarten dia 22 di aprel den Stadion Rignaal ‘Jean’ Francisca. Tur nos partidonan ta kuminsá 6’or di atardi.

 

Nos selekshon tin basta luna ta praktiká i prepará pa saka kara di Kòrsou durante e kampionato aki. Un grupo di 21 hungadó ta forma parti di nos selekshon nashonal femenino kategoria U-20 di kual 17 ta hungadónan áktivo den nos Kampionato Femenino i tambe 4 hungadó residensiá den eksterior ku a bin reforsá nos selekshon.

 

Nos selekshon ta wòrdu dirigí pa sr. Raúl González Triana ku ta wòrdu asistí pa sr. Heinrich Roojer i sr. Pablo Mark Alomá komo entrenadó di portero. Sra. Laicam Coeriel-How i Dianne Winklaar ta e masahistanan miéntras dòkter Eartha Helstone tambe ta kompañá e selekshon.

E ‘team manager’ di nos selekshon ta sra. Christine Davelaar i e hefe di delegashon ta sr. Remfis Donker, miembro di direktiva di FFK.

 

E siguiente hungadónan ta forma parti di nos selekshon;

 

1. Julainy Fanijten Thielman (Excellence School)
2. Rianda Pimienta Solano (Subt)
3. Charnainelys Andrea (Excellence School)
4. Judriën Torbed (Jong Colombia)
5. Kaaïsha Constansia (Excellence School)
6. Deyanisha Dorcas (Hubentut Fortuna)
7. Kimberly Olaria (Excellence School)
8. Queennaily Geertruida (Jong Colombia)
9. Caelyn Hodge (Excellence School)
10. Lisa Pasman (Excellence School)
11. Emily Pulido Baloa (Excellence School)
12. Rushaviana Petronilia (Jong Colombia)
13. Gervionna Martina (Jong Colombia)
14. Soerianieh Nucatia (Excellence School)
15. Queen-Jelly Alexandre (Excellence School)
16. Raëngelly Keller (Excellence School)
17. Aukje Moerdijk (Inter Willemstad)
18. Ludmarie Flaneur (Xerxes DZB)
19. Jeleaugh Rosa (Sparta Rotterdam)
20. Shermilyene Leito (Sv Seastum)
21. Nabiellene Nisia (VV Spirit)

 

Tur kos ta kla pa nos selekshon nashonal femenino U-20 su partisipashon na e 2023 CONCACAF Women’s Under-20 Championship ku lo tuma lugá di 14 pa 22 di aprel aki na Kòrsou!

 

Invitashon ta bai na pueblo di Kòrsou kompletu pa bin apoyá i sostené nos damanan durante e kampionato aki!

 

Nos ta topa mañan den stadion!