Maneho ekonómiko ta dunando resultado.

Maneho ekonómiko ta dunando resultado.

 

Ekonomia ta moviendo den bon direkshon: kasi 10 mil kupo di trabou a keda generá di 2020-2022 kual ta kondusí na bahada di desempleo.

Según sifra preliminar di Ofisina Sentral di Estadistika (CBS) a informٕá den sifranan apsoluto, e total di personanan empleá a subi di 57.050 na 2020 pa 66.722 na aña 2022. Pues 9.657 persona a haña trabou. A pesar ku nos poblashon a bira mas chikí pa motibu di emigrashon, tòg tabatin mas tantu hende ku a keda empleá entre 2020 i 2022. Desempleo bou di hóbennan tambe a baha den e periodo di e reportahe di CBS.

E ekspanshon di nos ekonomia den e último dos añanan a kontribuí na kresementu den empleo. Tantu MEO komo Banko Sentral ta spera un kresementu ku por keda ligá prisinpalmente na e desaroyonan den turismo di estadia.

Adishonalmente sektornan manera real estate, transporte, almasenahe i komunikashon, i tambe benta por mayor i detal a kontribuí positivamente na e ekspanshon ekonómiko indiká. Kontrali na esaki tabatin un kontrakshon den e sektor di manufaktura debí na e bahada di aktividatnan di reparashon di barku i aktividatnan den refinería ku no a lanta kabes mas. Pues e sektor metalurgiko ligá na refineria i Damen, kual ta empleonan ku salarionan mas haltu ku den turismo, no a mira un kresementu den e periodo tras di lomba.

 

Kresementu den e sektor di Turismo.

 

Kresementu den sektor di turismo a kontribuí na subida di kuponan di trabou. Sandals i otro hotèlnan ku a habri i kompanianan di horeca huntu a perkurá pa kuponan di trabou nobo. Rekuperashon real di nos ekonomia den 2022 ta indikashon ku loke MEO den koperashon ku ofisina di turismo ta hasiendo ta kumpli ku e meta di rekuperashon ekonómiko.

Desempleo ainda ta haltu.

E sifranan di CBS ta sifranan preliminar. E aklarashon ta bini den mei próksimo. Un pais ku un desempleo di mas ku 10% ainda tin un trabou grandi pa hasi, paso esaki ainda ta relativamente haltu. Nos mester sigui traha i stimulá aktividatnan pa nos yega bou di 10% den e próksimo aña. Na 2019 kaba nos tabatin un saldo di migrashon negativo. Pa loke ta 2022 CBS tin indikashon ku nos tin un saldo di migrashon negativo atrobe, esta mas hende ta bai ku tin hende ta bin establesé nan mes akinan. Mester krea mas trabou i mas posibilidat pa hendenan keda Kòrsou i pa esnan ku a bandoná nos isla por regresá.

 

Trabounan ta sigui.

 

Den 2023 tantu Banko Sentral i MEO a duna di konosé ku den 2023 ekonomia lo sigi krese kual lo kondusí na kreashon di mas kupo di trabou. Mi lo sigi hasi tur mi esfuersonan pa por sigi aportá na nos kresementu ekonómiko. Aktividatnan konkreto pa aportá na kresementu ekonómiko di 2023 i padilanti ta entre otro kombersashonnan ku ta tumando lugá pa habri rutanan aereo nobo dor di atraé kompanianan di aviashon for di diferente destinashon. Atrakshon di liñanan krusero ku lo bishitá Kòrsou den 2023 i 2024 i asina kreando mas aktividat ekonómiko. Hotèlnan ku lo bai habri den 2023, 2024 i 2025 manera Corendon fase 2, Marriott Courtyard, ekspanshon di Sandals, i varios proyekto grandi ku ta na kaminda. Lo sigui ku e programa di formashon pa garantisá fluho di trahadó pa e sektor di tursimo i hospitalidat.

 

Ta trahando riba un fondo di garantia pa fasilitá proyektonan ku ta stanká, lo sigui stimulá nos ekonomia interno i fasilitá empresarionan chikí i esnan den sektor informal pa hasinan formal. Diversifikashon pa medio di e strategia nashonal di eksportashon, stimulá produkshon agrario lokal, baha kosto di hasi negoshi i eliminashon di burokrasia, e asina yamá Red Tape, tin ku kondusí na un ekonomia mas fuerte, resiliente i na kresementu duradero.