Prome Minister Evelyn Wever – Croes PARLAMENTO A APROBA LEY MKB
“Danki na e mayoria den Parlamento cu a sa di sostene e ley cu ta ancra e ayudo financiero cu a wordo duna na companianan mediano y chikito durante pandemia”
Prome Minister Evelyn Wever-Croes, Minister di Economia Geoffrey Wever y Minister di Finansa Xiomara Maduro dialuna tawata den Parlamento pa trata e formalisacion di e yudansa financiero cu Gobierno a duna na companianan chikito y mediano durante e pandemia. “Esaki ta e manera cu Gabinete Wever-Croes a enfrenta e retonan cu e pandemia a trece cu ne”, Prome Minister a expresa.
Prome Minister durante su disertacion den e reunion den Parlamento a enfatisa cu Aruba tur tempo a sobrevivi situacionnon duro. Un ehempel sigur di esaki ta e ciere di refineria despues cu Aruba a sali for di e constelacion antiyano. Esaki ta e caso tambe cu e situacion di e pandemia. Aruba a logra esaki danki na e apoyo indespensabel di e gran mayoria di e comunidad di Aruba.
Gabinete Wever-Croes no a core pa su responsabilidad den e tempo dificil aki pero mesora a lora manga y a cuminsa traha duro pa saca Aruba for di e situacion aki tambe. Gobierno a concentra hopi riba salud y bida di nos ciudadanonan. Gobierno a atende cu e tema economico. Y a bin cu e plan con pa yuda companianan chikito y mediano di sector priva cu ta e weso di lomba di nos economia. A yuda e companianan cu a bin na remarke cu minimo 4 mil florin pa kwartal pa asina cubri nan gastonan. Gobierno na e momento ey y ainda ta kere cu esaki tawata sumamente necesario pa e companianan aki no kibra. Den total a paga 44 miyon florin na e companianan aki durante e pandemia.
Prome Minister a enfatisa cu e reunion publico di dialuna tawata pa ancra e cuadro legal di esaki. “Ya dia 20 di juni di aña 2020, Gobierno a informa Parlamento cu lo bay haci esaki y Parlamento no tawata tin niun obhecion pa esaki y awe nos a hancra esaki den un ley. Mi ta contento cu mayorina den Parlamento a aprob’e”, Prome Minister a remarca.
Prome Minister ta gradici tur esnan cu a yuda y brinda sosten den esaki y especialmente henter e comunidad di Aruba cu durante di pandemia a traha hopi duro pa hunto cu Gobierno domina e crisis di pandemia cu awe Aruba ta den recuperacion. “Un danki tambe ta bay na nos frontliners cu a traha hopi duro. Danki tambe na esnan cu a yuda pa ancra e ley cu a wordo aproba den Parlamento. Danki na Minister Xiomara Maduro pa su curashi y determinacion cu a haci cu Gobierno a logra brinda sosten na e companianan. Danki na Minister Geoffrey Wever pa su vision y determinacion grandi pa desaroya nos economia y fortifica nos fundeshi economico. Danki na e mayoria den Parlamento cu a sa di sostene e ley cu ta ancra e ayudo financiero cu a wordo duna na companianan mediano y chikito durante pandemia. Mi ta hopi contento cu Gobierno a haya e sosten aki”, Prome Minsiter Evelyn Wever-Croes a expresa.
