Dualistanan lanta riba!

Nada di reforma, premier ta ignorá GIK, anto miéntras tantu pueblo ta dualdu den insertidumbre.

 

 

Willemstad — Partido PIN a tuma nota di un petishon pa e hendenan di RdK bin parlamento lihé pa informá dje esfuersonan pa saka benefisio dje instalashonnan petrolero den Schottegat i na Bulbaai. Tambe PIN a tende dje petishon di un frakshon den parlamento pa un reunion públiko urgente pa klarifiká e rapòrt forensiko tokante CPR, paso parse ku e rapòrt ta mustra riba un gran kantidat di krimen kometé den e negosashonnan ku RdK.

Loke ta straña PIN ta ku esnan den e koalishon MFK-PNP ku tin nan boka yen di dualismo, ta sinta man krusá mira kon e promé minister di Kòrsou ta nenga di bin parlamento pa splika dikon ta ignora Grupo GIK su oferta pa start nos refineria lihé.

Ta ora pa stòp di papia di dualismo i kuminsá hasi dualista pa interes general.

 

Taha palu

Ta bon si parlamento reuní ku urgensha riba esfuersonan di RdK pa usa e plantanan di Isla awo ku korektamente a pone CPR porta’fo. Sinembargo e kuriosidat ei no mag tapa e echo ku ainda promé minister Pisas no a klarifiká e ponensianan di Grupo GIK ni tampoko a splika dikon e ta nenga di papia ku GIK siendo ku te na último e la keda un man riba barika ku e grupo dudoso CPR si.

Ku un Onderlinge Regeling — Areglo Mutuo — praktikamente sin pakete di invershon pa kompañ’e, awo ta mas importante ku nunka pa atende ku e oferta di Grupo GIK pa start nos refineria lihé. Prome minister mester bin splika den parlamento dikon no por.

PIN ta sigui pone lus riba e asuntu aki paso, meskos ku den e asuntu di reformanan, e gobièrnu Pisas a tuma komo kustumber pa keda bira rònt i taha palu rondó di tur loke ta importante pa e pais aki.

 

Pregunta

Na nòmber di e algun mil siudadano ku a vota pe, pa tur esnan ku a registrá pa kuminsá òf sigui traha na refineria i na nòmber di komunidat en general, Partido PIN ta kere ku e gobièrnu i koalishon aktual lo hasi su mes un fabor kontestando e siguiente preguntanan:

1. Ki dia ta yama promé minister pa den parlamento e klarifiká e ponensianan di Grupo GIK i splika dikon e ta ignorá GIK su oferta pa trèk nos refineria? Na e altura aki, kasi dos luna despues dje petishon p’e reunion, promé minister Pisas mester ta sufisiente prepará pa splika i kontesta pregunta.
2. Dikon spesífikamente e parlamentarionan di MFK i PNP ku ta karga e bandera di dualismo no ta pone mas preshon pa sr. Pisas bin duna klaridat riba refineria den parlamento pa kaba? Lo mester tin un splikashon logiko pa no hisa GIK foi tera tòg?
3. Kon ta hasi konfia ku RdK por trèk un búskeda nobo di operadó pa Isla eksitosamente si e no por splika dikon CPR si i Grupo GIK no?

 

Ku kontesta sinsero riba e preguntanan aki komunidat por orientá su mes riba kiko ta spera Kòrsou i riba su aporte pa saka pais dilanti.