Investigashon riba preis i efisiensia di Selikor

Ministerio di GMN a manda hasi un investigashon riba e gastunan ku Selikor ta kobra gobièrnu pa e servisionan ku e ta duna na komunidat di Kòrsou.

1 di yanüari 1996 Pais Kòrsou a firma un akuerdo di maneho ku Selikor, ku ta definí e servisionan ku Pais ta kumpra serka Selikor. Esaki ta den kuadro di un maneho integral di medioambiente i sushi. E servisionan aki ta wòrdu kumprá pa pais pa un kompensashon riba base di e akuerdo di preis.

Sin embargo, na 2022, Selikor a hañ’é den problemanan di likides i a duna di konosé ku nan tin un demanda riba Pais. Debí ku e debe aki no por a ser determiná i/òf rekonosé ainda pa Pais, gobièrnu a disidí na mart 2022 pa duna Selikor, bou di kondishonnan, un adelanto den forma di tres transhe, pa por atendé e problemanan di likides agudo di e kompania.

Pais Kòrsou, representá pa ministerio di GMN, tin e nesesidat pa evaluá e akuerdo di maneho. Ministerio di GMN a krea un komishon ku ta konsistí di empleadonan di e propio ministerio, Ministerio di Finansa i Selikor. E komishon aki ta enkargá ku e tarea di evaluá, aktualisá i finalisá e akuerdo di maneho basá riba kontribushon di tur e partidonan i teniendo kuentu ku desaroyonan aktual.

Konhunto ku e evaluashon aki gobiernu ta deseá di re-aktivá i finalisá e investigashon di kalkulashon di preis i e prinsipionan pa formulá e kompensashon pa servisionan duná.

P’esei, Pisas a pidi SOAB pa analisá detayadamente e kalkulashonnan di preis di e servisionan di Selikor ku Pais ta paga na bienestar di komunidat.

Di akuerdo ku ministerio di GMN, e preis di kosto i en partikular, e diferente komponentenan di kosto, yabi di repartishon di kalkulashon di preis i e alokashon di kostonan ku Selikor ta usa pa stipulá preis pa e servisionan ku ministerio di GMN ta kumpra, no ta kla i/òf no ta sufisiente fundá.

Ademas, ta importante pa tene kuentu ku efisiensia di prosesosnan den Selikor den kalkulashon di preis, pa evitá ku inefisiensia ta sòru pa efekto di subida di kosto di preis inesesario pa pais. No ta konosí si e efisiensia di e prosesonan den Selikor ta wòrdu salbaguardá i ki efekto esaki tin riba e kosto di preisnan.

Den kuadro di esaki, Pisas a pidi SOAB pa ehekutá un investigashon di e gastunan ku Selikor ta kobra gobièrnu pa e servisionan ku e ta duna na komunidat di Kòrsou. Tambe a pidi SOAB pa investigá te kon leu tin un maneho di kontrol di efisiensia di prosesonan sentral den Selikor, relashoná ku e servisionan ku ta wòrdu duná na Pais, i si esaki ta afektá e preisnan ku Selikor a apliká. Ta spera ku e investigashon aki lo ta kla den 4 luna.

Banda di e investigashon di kalkulashon di preis i efisiensia di prosesonan di Selikor, Pisas a pidi SOAB tambe pa duna sosten na e komishon menshoná pa yega na un beheersovereenkomst nobo.

Ku e akshonnan aki Ministernan Pisas i Silvania ta purba di trese solushon na un forma manehabel pa e problemátika relashoná ku kostonan di preis i défisit di likides di Selikor, i yega na un beheersovereenkomst nobo kaminda tur partido por haña nan mes na bienestar di komunidat.