Presentashon di Highway Band, ONE i Doble R Puru: Dia di Rei na Renaissance Mall & Rif Fort
WILLEMSTAD – Kòrsou ta klá pa selebrá Dia di Rei i Renaissance Mall & Rif Fort a prepará den grandi atrobe! E ambiente lo tuma lugá riba djárason dia 27 di Aprel rònt di e fòntein, e área di hotèl i den Rif Fort. Bishitantenan lo disfrutá di un merkado liber hopi variá ku e.o ‘bijouterie’, joyas trahá na man, artesania, obra di man, produktonan natural, mata, flor, i hopi mas. Tambe, lo tin un área spesial ku entretenimentu pa mucha. E selebrashon Dia di Rei na Renaissance Mall & Rif Fort lo ta di 10:00 pa 18:00. Riba e dia aki tambe- kuminsando pa 17:30- lo presentá e ‘Orange Fever’ ku presentashon di ONE Flavaz i Dj TRGXZ. Bo selebrashon ta kompletu; sali kas ku henter famia i disfrutá!
E aña aki lo ripití e ambiente GRÁTIS di Pre-Kings Day Fiesta dia 26 di April!
Tur establesimentu lo ta habrí dia 26 di Aprel te ku 6’or di anochi ofresiendo deskuento i promoshonnan atraktivo. Bishitantenan lo disfrutá di un fiesta total ku presentashon di; Highway band, Doble R Puru, DJ Eli , i DJ Woodz. Lo tin músika ‘live’ na 5’ O clock Somewhere Bar & Grill for di den oranan di atardi ku Highway Band. Pa 9 ‘or i mei di anochi Doble R Puru lo subi esenario di Rif Fort pa ofresé un konsierto baliabel GRÁTIS te 12or di anochi. Naturalmente bishitantenan tin amplio variashon di restorant i ‘cocktail bar’ pa skohe for di dje durante di e Pre-Kings Day Fiesta den Rif Fort. Kòrda ku espasio ta limitá, yen ta yen!
