Ku 1.5 mion di SOAW, Reda Sosial lo drecha entre 90 pa 100 kas deplorabel den próksimo 6 lunanan.

Willemstad – Un di e metanan di ministerio di SOAW manera deskribí den e programa di gobernashon pa e periodo di 2021 pa 2025 ta pa fortifiká e kalidat di bida di e suidadano di Kòrsou. Den e kuadro ei i pa kumpli ku e meta, ministerio di SOAW den koperashon ku Reda Sosial a reaktivá e projekto pa drecha kas di suidadanonan ku ta biba den un situashon no akseptabel den nos komunidat.

Na 2018 tabata último biaha ku Reda Sosial a risibí finansiamentu di gobièrnu pa e suma total di NAf.1.5 mion pa e projekto. Den añanan anterior tabata risibí apenas 100-mil florin pa por a drecha algun kas so.
Riba petishon di Reda Sosial, e gobièrnu aktual via Minister Larmonie-Cecilia a bolbe pone e fondonan di NAf.1.5 mion disponibel pa reaktivá e projekto.

Reda Sosial ta manehá un lista di petishonnan ku ta drenta serka diferente instansia, organisashonnan di bario, na Reda Sosial mes i via Ministerio di SOAW. Ta hasi un analisis di kada petishon promé ku drecha kas. Reda Sosial ta kolektá varios informashon promé ku un hende por bini na remarke pa e projekto. Entre otro ta tene kuenta ku e situashon sosial na e kas, ken ta doño di kas i tereno. Den mayoria kaso ku ta yuda drecha kas di grandinan ku ta dependé solamente di nan entrada di penshun òf kaminda e hende ta kobra ‘onderstand’ so. Den kasonan ekstremo sa traha kas tambe pa esnan ku ta den un nesesidat grandi i nan bibienda no por keda drechá.

E meta ta pa den e próksimo 6 lunanan, drecha entre 90 pa 100 kas den estado deplorabel ku e montante di Naf. 1.5 mion ku Ministerio di SOAW a pone disponibel.