EKSITOSO ENTRENAMENTU TOKANTE APLIKASHON PA FONDONAN OROPEO

EU Desk Curaçao preparando pa selebrá su promé lustro.

Willemstad – Representantenan di EU Desk Curaçao, a partisipá resientemente na un programa di entrenamentu tokante uso di fondonan Oropeo. E programa ku a marka alabes e introdukshon di Sr. Edison Rijna komo representante spesial di Reino enkuanto Fondonan Oropeo pa islanan BES, a tuma lugá na Boneiru. Organisashon tabata den man di Ministerio di Asuntunan Interior di Hulanda i sekretario di estado di Reino enkargá ku Karibe Hulandes, Sra. Alexandra van Huffelen a hasi apertura ofisial.

Tur e seis islanan ku ántes tabata forma Antia Hulandes, tabata representá durante e programa. Di parti di Kòrsou a bai sra. Judric Pietersz ku ta enkargá ku fondonan Oropeo pa desaroyo di parti di Ministerio di Asuntunan General i un delegashon di EU Desk Curaçao, enkabesá pa sra Vanessa Toré ku ta Hefe di Sekshon di Koperashon Komersial Internashonal di Ministerio di Desaroyo Ekonómiko i alabes Hefe di EU Desk Curaçao.

Durante e entrenamentu e partisipantenan a deliberá tokante eksperensia i nesesidat di kada isla pa loke ta trata fondonan Oropeo. Básikamente tin dos tipo di fondo Oropeo. Fondo pa Desaroyo ku ta bai riba nivel di gobièrnu i e asina yamá fondonan horizontal ku ta bai entre Union Oropeo ku otro organisashonnan, ku no nesesariamente mester ta un organisashon di gobièrnu.

Na Kòrsou Ministerio di Asuntunan General ta atendé ku fondonan Oropeo di desaroyo, miéntras EU Desk Curaçao, ku e aña aki ta bai kumpli su promé lustro, a krea un struktura den kua e ta informá i asistí organisashonnan lokal ku nan aplikashon pa fondonan Horizontal.

E partisipantenan di tur e islanan a gusta e modelo ku EU Desk Curaçao a desaroyá i a mustra hopi interes pa risibí mas informashon di esaki. Temanan ku a bin dilanti durante e seshonnan ta entre otro nesesidat pa oumentá e kapasidat pa skibi proposishon pa haña finansiamentu den e modelo ku Union Oropeo ta rekerí, nesesidat di fondo pa yuda e islanan mehorá konektividat i fondo pa oumentá seguridat alimentisio.

Tur e partisipantenan a enfatisá e deseo pa kolaborá mas ku otro i sigui kompartí informashon. Finalmente nan a forma un grupo di koperashon i a identifiká diferente proyekto ku e kolektividat ta bai traha riba den e lunanan benidero. Entre nan, oumentá konosementu pa apliká pa fondo i traha un plan di trabou komun pa realisá e proyektonan di kual konektividat i seguridat alimentisio ta esnan di prioridat.

Representantenan di EU Desk Curaçao a keda hopi kontentu ku resultado di e tres dianan di trabou i den kuadro di selebrashon di e promé lustro ta inkluí e plan aki komo un parti integral di su aktividatnan. Pronto EU Desk Curaçao lo tene diferente tayer i presentashon pa organisashonnan lokal den kua lo traspasá e konosementu nobo i asina yuda nan oumentá nan kapasidat pa apliká pa fondo Oropeo.