INOVASHON I INTERNASHONALISASHON PA MEDIO DI EKSPORTASHON

Curaçao Export Week 2023

Willemstad- Pa di seis (6) aña konsekutivo, Ministerio di Desaroyo Ekonómiko (MEO) ta organisá e Curaçao Export Week durante e siman di djaluna, 15 di mei pa djabièrnè 19 di mei próksimo. For di aña 2018 Curaçao Export Week ta keda organisá tur aña den e di tres (3) siman di mei i e ta un siman yená ku charla, presentashon i pènelnan dediká na pone atenshon èkstra i profundisá riba e importansia i potensial di eksportashon di tantu produkto komo servisionan for di Kòrsou pa merkado internashonal. Tambe, Curaçao Export week tin e ophetivo pa entre otro proveé mas tantu rekurso i konosementu posibel tokante eksportashon i fasilitá e interakshon entre empresanan komo entre e empresa i su konsumidó.

Curaçao Export Week 2023 spesífikamente ta bai enfoká riba e tema “Innovation and Internationalization through export” (Inovashon i internalisashon pa medio di eksportashon.
Durante e siman akí lo toka temanan manera: e ròl di teknologia den internalisashon i eksportashon, inovashon den strategia di eksportashon, e mihó práktikanan den komersio international i hopi mas.

Manera ya ta konosí, MEO ta den fase di implementashon di Kòrsou su Strategia Nashonal di Eksportashon kual tambe lo bini dilanti durante e Curaçao Export Week akí.  E Strategia Nashonal di Eksportashon akí netamente ta amplia riba 7 sektor lokal ku gran potensial pa eksportashon i generamentu di divisa. E sektornan akí ta Servisionan teknológiko/IT, Servisionan den kuadro di edukashon, Servisionan Marítimo i di Haf, Ekonomia Blou (Blue Bio Economy), Industria Kreativo, Servisionan Finansiero i resientemente ta desaroyando un strategia pa e sektor di turismo médiko i “wellness”.

Un i tur ku ta deseá por partisipá virtualmente na un òf mas di e seshonnan durante e siman akí dor di registrá aki.
Un bista di tur e diferente seshonnan durante e siman, ta disponibel via https://bit.ly/ProgramaCEW2023.