Agente polisial V.Flores (45) a presentá den korte akusá di a tira i herida e víktima

Den oranan di mainta e agente polisial V.Flores (45) a presentá den korte akusá di a tira i herida e víktima – sospechoso Chakoetoe na momento di un ladronisia den e negoshi Gomperts Cooling na Cas Coraweg.

E akusado a splika ku nan a haña e anunsio di kiebro den e negoshi i ku lo tabatin 4 pa 5 ladron den e negoshi. Na yegada a bin topa ku e porta di kura habrí i tambe di e negoshi. Akinan e polis a saka su arma reglamentario pa drenta i kontrolá den e negoshi. Kontrolando den e negoshi e la señalá un tipo tur na Pretu bisti ku kapuchon skondí tras di un èrko.

Mesora Floris a grita “Stop Polis”, pero e tipo a kuminsá kore. Na e momento ei e la skucha kon su otro kolega pafó mester a lòs un tiru ku a bin resultá di ta unu di atvertensia. Segun e akusado e la sali tras di e tipo i a lòs dos tiru dirigí den direkshon di pia di e sospechoso kual a alkanse na e rudia robes i tambe na e pia drechi. Fiskal a splika ku e ta haña ku e agente polisial no a sigui e instrukshon pa ku uso di arma di kandela lokual lei te preskribí pa ku su trabou, pero ta tene kuenta si ku su situashon personal unda e ta pasando den stres ku e kaso i ku tambe e mester a tuma un desishon den ménos ku un sekònde ku e ta usa su arma.

Tokante henter e situashon aki fiskal a yega na un demanda di 24 ora di trabou kondishonal durante un periodo di prueba di 1 aña. Hues a opta pa bai pensa riba e kaso i tuma un desishon dia 6 di yüni benidero.