SKOL DI DAM PA HUBENTUT RAIS A BIRA UN REALIDAT

SKOL DI DAM PA HUBENTUT RAIS A BIRA UN REALIDAT

 

Dia 15 di mei último e organisashon di dam pa hubentut “Rais Youth Draught Foundation Curaçao” ofishalmente a keda lantá den un fundashon na ofisina di notario Fung-A-Loi & Samander. Meta di e fundashon ta pa primeramente promové wega di dam entre hobennan di Kòrsou, tambe pa desaroyá i  alsa e nivel di wega di dam den tur sentido di palabra serka nos hobennan i alabes krea un generashon nobo fuerte i kompetitivo di praktikantenan di wega di dam na Kòrsou bou di nos hubentut.

 

Ta bon konosí ku deporte di dam ta un deporte kaminda e nivel i kapasidat di pensa di un persona ta hunga un ròl hopi importante. Durante di kada wega bo ta keda desafiá pa pensa i uza bo mente, pa konstantemente apliká ki strategia di wega bo ta bai uza, kua ta e hugada ku bo ke bai hunga i hasta pensa  i antisipá hungadanan di bo atversario. Pues durante henter wega bo mente ta keda aktivo i fet.

 

Wega di dam sigur sigur ta un deporte ku ta trese hopi benefisio pa nos hubentut. Dor ku nan mente ta konstantemente aktivo, nan ta siña analisá mihó, nan ta siña dominá nan emoshon ora di solushoná un problema (no hansha, no bira nervioso), nan ta siña tambe kon pa trata ku pasenshi i dor ku konstantemente nan mente ta aktivo e por yuda nan den nan siñamentu di lèsnan di skol.

 

Wega di Dam bou di nos Hubentut

Wega di dam no ta un deporte deskonosí riba nos isla. Apesar di su popularidat, e no ta un deporte ku ta haña sufisiente atenshon bou di nos hubentut. Mirando e nesesidat aki, e konosido maestro lokal di Dam di Kòrsou, señor Raoul Alias a tuma e inisiativa pa lanta un fundashon ku e meta spesifiko pa promové deporte di dam bou di hubentut di Kòrsou.

 

Komo un di e promé inisiativa pa logra esaki, señor Raoul Alias riba propio inisiativa i boluntariamente a bolbe kuminsa ku dunamentu di lès di dam na diferente skol. Skolnan ku a kuminsá ku e proyekto aki ta Kolegio Fatima, San Fransiscus College i Kolegio Iris Bruyning. Lamentablemente Kolegio Iris Bruyning no por a sigui mas ku e proyekto. Adventschool Bonam awor tambe ta forma parti den e proyekto. Banda di e lèsnan di dam na skol tambe señor Raoul Alias ta train algun hoben na e Sentro di Rais Youth Draught Foundation Curaçao situá na Kaya Kurtisa 2. Ta e intenshon pa sigui bishita skolnan di Kòrsou pa sigui promove e deporte di dam bou di nos hubentut.

 

 

E interes pa e deporte di dam ta grandi serka nos hobennan

Mester bisa ku den e korto tempu ku Rais ta organisando su aktividatnan di dam, no solamente e interes bou di nos hubentut pa e deporte di dam ta birando grandi, pero tambe e nivel kompetitivo ta kresiendo. Den e korto tempu aki “Rais Youth Draught Foundation Curaçao” ya a logra di alsa nivel di 2 hóben ku resientemente a representá “Rais Youth Draught Foundation Curaçao” den un torneo Inter Insular na Boneiru i tambe un torneo internashonal na Republika Dominikana iTurkia.

 

Trainingstage  di Dam na Hoogeveen Hulanda

E siguiente proyekto di “Rais Youth Draught Foundation Curaçao” ta pa manda 2 di su hoben studiante afó pa nan partisipá na un trainingstage na Hoogeveen Hulanda.  E proyekto aki ta keda realisá danki na e koperashon di Koninklijke Nederlandse Dambond (KNBD) i “Rais Youth Draught Foundation Curaçao” mes. Na final di e workshop e skol di dam di Hulanda ta organisá un kampeontao di dam ku partisipashon di tantu hobennan di Hulanda komo otro hobennan di otro pais. Ta un okashon ideal pa e dos studiantenan di Kòrsou tambe partisipá na esaki. Hasiendo esaki nan por atkerí mas eksperiensha pa lokual ta weganan di kampeonato i tambe ku otro hobennan internashal. E intenshon tambe ta, pa ora e 2 studiantenan aki bin bèk Kòrsou pa nan pasa nan konosementu ofer na sobra studiantenan di “Rais Youth Draught Foundation Curaçao”.

 

Si tin instansha òf persona ku ke kolaborá ku “Rais Youth Draught Foundation Curaçao” por tuma kontakto ku direktiva na e-mail board@raiskids.com.