Festival Un Kanto pa Kòrsou 2023

 

 

 

 

 

16 di Yuni 2023

 

 

Kontenido        

 

Introdukshon                                                     pag   3

Mensahe di gobièrnu                                         pag   3

Meta di e proyekto                                            pag   4

Kontenido di e proyekto                                    pag   4-5-6

Instrukshon di hurado                                        pag  6

Ganadornan 2008- 2021                                   pag  7-9

Dedikashon UKpK 2008- 2021 i 2023               pag 10-13

Programashon                                                   pag 14

Partnernan                                                         pag 14

 

 

 

 

 

Festival Un Kanto pa Kòrsou 2023

Organisashon: Amak den estrecho koperashon ku Servisio di Kultura.

Introdukshon

Na 2021,e ultimo Festival Un Kanto pa Kòrsou den su forma habitual a kontinuá i Gobièrnu di Kòrsou a bai di akuèrdo ku un presupuesto redusí pa e Festival por kontinuá.

Na 2022 Gobièrnu di Kòrsou a organisá un evento pa krea kansionnan nobo relashon ku selebrashon di dia di Bandera 2022, ku partisipashon di hóbennan for di diferente bario.

Saliendo for di punto di bista di nos aktual Minister di OWCS, e aña aki, Amak lo organisá e di 14 edishon di Festival Un Kanto pa Kòrsou den estrecho kolaborashon ku Servisio di Kultura den un konsepto diferente, konsiderando lo siguiente:

1. Lo tin dos difrente kategoria pa kompetensia : Unu ku partisipashon di hóbennan i unu partisipashon di adultonan
2. Un total di 6 agrupashon musikal en bes di un orkesta grandi, lo kompañá e partisipante. Esaki lo trese un dimenshon extra pa loke ta trata e kompetensia entre e bandanan musikal tambe. Agrupashonnan musikal por traha nan mes komposishon i skohe nan mes kantante di manera ku e kansionnan ku mensahenan positivo lo keda zoná durante henter aña.

 

E komishon organisadó ta hopi kontentu ku Músikonan i Artistanan partisipante, tur di un òf otro forma, a duna un kontribushon ku e meta komun ku Festival Un Kanto pa Kòrsou 2023 por bira un realidat.

Ban krea positivismo, patriotismo i mas union den e pueblo dushi, ku yama Kòrsou.

 

MENSAHE DI GOBIÈRNU DI KÒRSOU

Un Kanto pa Kòrsou ta un festival ku for di 2008 duna oportunidat na nos artistanan riba e área di komposishon di letra melodia i interpretashon di kansion, pa nan halsa e sentido di patriotismo d i nos pueblo. Pues Un Kanto pa Kòrsou ta un plataforma pa talento di Kòrsou riba e área di músika brota!

Gobièrnu di Kòrsou ta gradisí Instituto pa Formashon Musikal ku tur aña di nobo ta sostené Gobièrnu den e organisashon di e festival akí. Nos pais a konosé diferente kansionnan nobo ku ta kanta e grandesa di nos pais. Nos a disfrutá di esaki i nos a sinti nos mes motivá pa sigui stima nos pais.

Pues un aporte tremendo pa alsa e sentido di patriotismo di nos pueblo. E aña akí Gobièrnu di Kòrsou, ehekutando e proyekto Mi Talento pa Mi Pais, a saka talentonan nobo for di barionan ku por partisipá na un Kanto pa Kòrsou i pa asina enrikesé e festival ku talentonan nobo.

 

Gobièrnu di Kòrsou ta gradesido tambe ku e inovashon ku  AMAK a trese den e festival pa e artistanan ku  ta bai presentá! Ban pa un edishon nobo di Un Kanto pa Kòrsou yen di kreatividat!

Gobièrnu ta spera ku pueblo lo sostené e festival akí ku nan presensia i pa mustra ku pueblo di Kòrsou ta apoyá e inisiativa aki.

Ku ser Supremo duna boso tur forsa pa boso por sigui kumpli ku e yamada pa sigui aportá na mas posibilidat pa kreashonnan di nos músikonan resaltá.

 

Minister di Enseñansa, Siensia, Kultura i Deporte

Srr. Sithree van Heydoorn

 

 

META DI EVENTO “UN KANTO PA KÒRSOU”

 

Organisá un festival/kompetensia di kansion kual e komposishon mester ta unu original i su kontenido mester kontené frasenan pa :

1. Promové e sentido di patriotismo na Kòrsou
2. Oumentá i stimulá apresio pa aspektonan kultural
3. Krea mas union entre siudadanonan
4. Duna rèspèt na otro i ser un siudadano ehemplar
5. Duna mas oportunidat pa nos artistanan por kompartí tarima
6. Duna nos artistanan oportunidat di demostrá nan talento
7. Ilustrá nos flora, founa i tur nos rikesanan natural
8. Oumentá e apresio pa nos idioma materno
9. Ilustrá nos éksitonan internashonal den arte i deporte
10. Kontribuí na e konsepto di “nation building”

 

Punto di atenshon : E intérprete ganadónan huntu ku e agrupashonnan musikal ku a kampañanan lo presentá e komposishonnan ganadó dia 2 di yüli riba Plasa Brion na selebrashon Dia di Bandera di Kòrsou. 

 

KONTENIDO DI EVENTO:

 

@ Fecha/orario/lokalidat/preis i punto di benta

 

• Fecha djabièrnè 16 di yüni 2023
• Orario : 8.30 pm – 11.30 pm
• Lugá : Sirkuito di ambiente den Curaçao Festival Center (area di red carpet)
• Preis : Ang. 25,– na 24 uur uit de muur, Festival Center, partisipantenan i agrupashonnan musikal.

 

 Agrupashon musikal i kantante:

1. Excellence : lo kompana 3 hoben entre 12 pa 17 aña di edat. Esaki ta skoh’é pa Sekshon di Kultura for di diferente bario.
2. ERA lo kompaña 3 hoben entre 15 pa 21 aña. Esaki tambe skoh’é Sekshon di Kultura
3. ONE Flavaz
4. Dolce Band
5. Hopi Forsa
6. Classic XD

Fuera di Excellence i ERA, sobra agrupashonnan musikal lo akompaña dos (2) kantante. Asina nos ta totalisá 14 kantante: 3 den kategoria di hobennan akompaña pa Excellence i 11 den kategoria adulto (kual ERA ta akompaña e 3 kantantenan skohé pa Sekshon di Kultura.

 

Tur agrupashon musikal ta responsabel pa :

• Areglista
• Si nan ta deseá kompositor

Otro reglanan importante :

1. E areglo meter ta skibí ku partitura pa brass, piano i bas.
2. Mester entregá e areglo na Amak. Pa dia di bandera lo ekspandé e areglo.
3. Agrupashonnan musikal mester warm up ku nan propio hit (di +/- 10 minüt max.)
4. Agrupashonnan musikal mester keda disponibel durante henter anochi.
5. E kansionnan ganador lo keda interpretá un biaha mas na final
6. E sekuensia lo keda disidí pa medio di lòt. (Excellence ta number 3 debi ku e ta akompana e 3 hobennan entre 12 pa 17 anya di edat i Classic XD lo presentá komo ultimo banda musikal pa akompaña e persona ku e festival ta dediká na dje.
7. E ganadornan kategoria adulto lo risibí premionan den forma efektivo i kantantenan den kategoria hoben lo risibí premio den forma di material :

 

Kompositor kategoria adulto                                              Ang.     3.500,–

Kompositor kategoria hóben                                              Ang.     1.000,–

Kantante ganadó                                                             Ang.     1.000,–

Kantante prome finalista                                                 Ang.        500,–

 

4. Agrupashonnan musikal lo keda kompensá pa nan partisipashon Ang. 4.500,–

 

@ Lokalidat/Sètùp 

• E evento lo tuma lugá na Curaçao Festival Center.
• Lo duna oportunidat pa parker parti paden i lo stipulá un preis pa esaki
• Lo pèrkurá pa seguridat na 2 porta (entrada pa outo i entrada pa hende)
• Lo invitá tin dos stent di kuminda.
• Lo tin bar disponibel
• Ta krea un espasio den e sekshon di “red carpet” (ku lo ta será ku 4 tribuna bar i 2 stènt di kuminda i “dranghek”) i lo ubiká un máksimo di 1000 stul den forma di un medio sirkulo den e área será aki
• Agrupashon musikal lo keda posishoná riba tarima (parti dilanti) huntu ku e koristanan
• Kantantenan lo presentá riba un plataforma di 4×4 (haltura di 50cm) mas abou na e tarima
• Dekorashon :

– pantaya riba tarima kual lo ilustrá nòmber di kantante, kompositor,

kansion i tambe logo Branding Partners.

 

INSTRUKSHON PA HURADO UKPK  2021

1. Un kuerpo di hurado di 5 pa maksimalmente 7 persona ku konosementu musikal. presidí pa un presidente lo husga partisipantenan na festival, “Un Kanto pa Kòrsou 2023”, konforme e reglanan di e festival.
2. Votonan di kada hurado lo keda prosesá pa funshonarionan di
3. E kuerpo di hurado lo vota riba e siguiente kategorianan:

1a.Melodia te ku un máksimo di     150 punto;

1b. Entonashon                              75 punto

2. Letra te ku un máksimo di 150 punto
3. Areglo te ku un máksimo di 75 punto
4. Lo bai tin solamente un presentashon di kada kantante.
5. Despues di e presentashonnan e kuerpo di a hurado ta reuní riba e skornan pa saka e ganadornan.

Pa e resultado final e kuerpo di hurado lo saka entreprete ganador absoluto i prome finalistá di tur dos kategoria (hoben i adulto)

E premio mas popular ta bai pa esun ku bende mas karchi.

6. No ta permití ningun miembro di hurado pa komuniká ku partisipantenan ni públiko.

 

 

 

 

 

 

GANADOR DI ULTIMO 13 AÑANAN UKPK

 

AÑA	TITULO	KANTANTE	KOMPOSITOR	LUGA
2008	Orguyoso di ta yu di Kòrsou	Julius Andruw	Ike Jesurun	C.F.C.
2009	Amor komo destino	Charaima Perozo	Ruth Samson	Brakkeput Mei Mei
2010	Un bon yu di tera	Trio: Reinir/Liesje/Igmar	Oko Dap	Brakkeput Mei Mei
2011	Patriotismo di un Pueblo	Eldrison Eugenio	Eldrison Eugenia	WTC
2012	Un Kòrsou bibu	Veanira Reed	Eldrison Eugenia	WTC
2013	Nostalgia	Ingereli Francois	Ana- Iria Nivelac	Because Entert. Center
2014	Mi baranka	Rebecca Benschop	Eldrison Eugenia	WTC
2015	Profundidat di bida	Harlianne Silvanie	Eldrison Eugenia	Brakkeput Mei Mei
2016	Ban desaroyá	D. Lopez-D. Gomez	Eldrison Eugenia	WTC
2017	Patria Stimá	Ebony Albertus	Ced Ride	Brakkeput Mei Mei
2018	Kòrsou mi dushi	Lady Su	Darwin Gregg	Brakkeput Mei Mei
2019	Siendo un feto ya mi a stimabu	Richard Engelhardt	Eldrison Eugenia	Brakkeput Mei Mei
2020
2021	Amor lo prevalesé	Ronalys Libiee-Casimiri	Eldridson Eugenia	Randal Corsen

 

 

 

Ganadornan  2021

 

 

 

 

 

 

 

 

 

 

 

 

BALUARTENAN NA KUA A DEDIKÁ UKPK

 

2008             George Willems d.f.m.

2009             Tobias “Tobby Lampe

2010             Mafalda Minguel,

2011             Greta Martha d.f.m.

2012             Ced Ride.

2013             Rudy Plaate

2014             Alejandro “Jando” Frans d.f.m.

2015             Rignald Vidal

2016             Errol El Torro”Colina d.f.m.

2017             Oswin Behilia i Yeyo Calderon

2018           Melania van der Veen

2019           Juni Juliet

2021          Tim di kalamidat

 

 

 

 

 

 

 

 

 

 

 

 

 

DEDIKASHON di UKPK 2023

E aña aki e komishon organisadó a tuma e desishon pa dediká  festival Un Kanto pa Kòrsou na e gran baluarte intérprete músiko, sr Romeo Heije.

Athunto un biografia kompakto di Romeo.

 

A.Informashon personal Romeo Heije

Nòmber : Romeo Raymond

Fam : Heije

Fecha di nasementu : 24 mart 1950, riba un djabièrnè. Mayornan tabata biba den

Marchena.

Mas o menos 1 aña despues e famia a muda bai biba na Kas Chikitu (Kolebra bèrdè).

Ku mas o menos 14 aña di edat ela bai biba den Wishi.

Aktualmente Romeo ta biba den Wishi, na e mesun adrès.

 

Tata :Guillaume Joseph Heije nasé na Sürnam (1917). El a yega Kòrsou den aña 1939 i

a traha promé komo “militaire politie” i despues den Kuerpo

Polisial di Antias. El a fayesé na aña 1977.

 

Mama :Elisabeth Reina Heije – Wanga, nasé na Bonaire (1921). El a yega Kòrsou na aña 1938 i tabata traha den hòspital St. Elisabeth i Sanatorio. Na Kòrsou el a sera konosí ku Guillaume (Guilly), nan a namorá otro i nan a kasa na luna di mei di aña 1949. Reina a fayesé na luna di mei di aña 2015. E tabatin 93 aña.

 

Tata di Romeo tabata toka klarinèt i tempu di su hubentut el a kanta den kor di misa di

“Evangelische Broedergemeente” na su país natal Sürnam;

Promé ku Romeo su mama a kasa e tabata kanta den e kor di misa di hospital St.

Elisabeth.

Mama i tata di Romeo tabata kumpra hopi disko i regularmente tabata tokanan na kas.

Su mama tabata gusta toka piesanan popular na Spañó i Hulandes anto su tata tabata

toka tur sorto di piesa i género di müzik. Di müzik popular te ku müzik klásiko i

piesanan instrumental di diferente orkesta;

Na “lagere school” Mgr. Nieuwindt college, Romeo tabata den e kor di skol. E tempu ei

tabata skol di fraternan;

Na edat di 8 aña el a kuminsá bai “padvinderij”. El a kuminsá komo “welp” i a sigui subi

den e diferente rangonan di e organisashon. Komo miembro di “Verkennerij” grupo

Pius X ku tabata reuní na e “lagere school” Pius College na Wishi, el a siña toka

diferente instrumento. El a siña toka tròmpèt, drùm, kitara i tambe a siña kanto serka

e.o. nan lider sr. Richard Thodé;

Komo miembro di drùmbènt Romeo a siña toka “platte trom, bazuin, hoorn, trompet,

1ste hoorn”.

Suplando “hoorn” el a bai reforsá “verkennerij” St. Paulus-groep di Steenrijk su

drùmbènt di Katholieke Verkenners. Nan a presentá tambe pa su mahestat Reina

Juliana (probablemente1962). Huntu ku sr. Ramiro Schobaar.

 

B Müzik den tempu di su hubentut (mas o menos edat di 12 pa

18 aña

 

Na St. Thomas College (MULO-school) Romeo tabata den e “Schoolband” huntu ku

e.o. Randy Wiel, Stanley Betrian, Melvin Cijntje i Elco Gonet. Nan tabata ensayá

despues di skol i tabata presentá na aktividatnan di e skol so;

El a toka tambe den grupo di aguinaldo ( aña 1967) “Los Brilliantes”; e temporada aki Romeo a tuma lès di müzik serka sr. Felipe Ridderstaat, q.e.p.d., di St. Vincentiusharmonie. El a sera konosí i práktika kanto ku e método Bell Kanto.

 

1. Müzik i kanto den tempu di su adolesensia (mas o menos

edat di 18 pa 22 aña)

 

Romeo a kuminsá toka den “beatband”, Los Dandy’s huntu ku e.o. Silvio Koeiman,

Darell Balentina, Oswin Nicia, i Humphrey Leocadia. Romeo tabata toka bas i kanta.

Karel Thielman, Lesly Daal, Egmar Balentina i Edmar Wiske tambe a yega di kanta

den e banda. Pa tren respirashon Romeo tabata kore subi trapinan di Zwarte Berg, na Wishi, bai bin. Hasta nan tabata tren toka nan instrumèntnan riba Zwarte Berg.

El a toka guitara Bas i a kanta tambe den e banda:The Blues, huntu ku Melvin

Bernabela, Freddy Grovell i Franklin.

E banda The Blues despues a kambia di mènedjer i di nòmber i tabata yama: The

Magic Stars. E banda aki a yega di kompañá diferente artistanan di eksterior ku a bin

presentá na Kòrsou, den diskoteka “the Pussycat”.

Romeo a partisipá diferente biaha den festivalnan di kanto di Romoldo Hanst, den

teatro West-end. E tempu ei el a haña e “bijnaam” di “The New Tom Jones”, dor ku e

tabata interpretá e piesanan di e kantante ei di un manera eksepshonal i su bos mes

tambe tabata impreshoná tur hende.

For di e temporada ei Romeo mes tabata sòru pa buska i haña informashon tokante

tokamentu di bas, pa e praktiká su akortnan i asina ei kada bes e dominá e instrumènt

mihó. Ela yuda e banda Astronauts di Banda Bou. Jaime Fabias, entre otro, tabata

integrante di e banda.

 

D Müzik i kanto di su 23 aña di edat te aworaki.

 

Bandanan popular:

Romeo a militá den diferente combo. El a kuminsá den Super Special Combo,

despues den Super Dynamic kual e mes tabata dirigí musikalmente. Tambe el a

toka, kanta i dirgí den Doble R Super Special Stars.

Orkesta Delight tambe ta un di e bandanan popular ku Romeo a dirigí i kaminda ela

kanta i toka.

El a komponé diferente piesa, mayoria balada, ku e mes a kanta tambe. Su promé

dos komposishonnan tabata “Maria“ i “La última súplica” den Super Special Combo.

E temporada akí e tabata haña tambe instrukshon musikal serka sr. Errol “El

Toro”Colina i e mes tambe tabata buska informashon for di bukinan di instrukshon

musikal, pa asina e mehorá su habilidatnan di kanta, toka i komponé.

Temporada ku e tabata na Hulanda ela toka i kanta den Los Bomberos, dirigente

Paul Welvaart. Ela yuda tambe kantantenan di grupo Escala(Hulanda) ku letra, melodia, grabashon. Norman (Nònchi) Matheeuw tabata dirigí e grupo.

Romeo tabata miembro di algun kor na Hulanda: Mannenkoor na Rotterdam,

Gemengde koor na Rotterdam i Almere koor.

 

Festivalnan di kanto:

• Un di su promé premionan den kanto tabata 2do premio di Bunny’s Club di, e tempu ei, Hotel Trupial Inn;
• 3 biaha ganador apsoluto di Festival “Bos di oro di Kòrsou”, entre añanan 73 – 75;
• na 1975 mihó bos di Caribe na e Festival Internacional de la Voz y la Canción de Puerto Rico”;
• na 1977 ganador 1e lugá pa bos i na di 3 lugá pa kansion, na e Festival di Puerto Rico. Título di e kansion tabata “More and more”, komponé dor di Errol Colina;
• na aña 1987 ganador festival di OTI di Antias. Un piesa kantá duo huntu ku su ruman muhé Rose Heije. Nan a representá Kòrsou na e festival Internashonal di OTI na Lisboa, Portugal;
• Ganador di Gospel Song Festival (Kòrsou);
• 2 biaha ganador di Gospel International festival (último tabata na Seru di Orashon);
• B.U. Golden Award. – Romeo a representá Kòrsou na Barbados. C.BU. ta para pa Caribbean Broadcasting Union, pues un asosiashon di kompanianan di televishon di diferente país den Karibe. Telecuraçao tambe tabata forma parti di e organisashon.
• 28 di yüli 2018 – Romeo a representá Kòrsou/Caribe den e X Festival Internacional de la Canción para Personas con Discapacidad Visual na Guatemala.

 

Lès di müzik:

• Di añanan 1982 pa 1987 Romeo tabata kordinadó di skol di müzik di Banda’bou. Lèsnan tabata tuma lugá e.o. den e barionan Westpunt, Soto, Barber, Willibrordus i Dokterstuin;
• E tempu ei Romeo tabata dosente tambe di müzik na e skolnan Infosodo i

Emmaschool;

• Romeo a kursa 3 aña na Conservatorium di Arnhem Hulanda den e spesialisashon di “schoolmuziek en zang” (HBO lerarenopleiding);
• Di aña 1996 pa 2000 Romeo tabata kordinadó di e proyekto sosial-musikal na internat Kas pa Hubentut (antes San Fernando na Soto) (presentashon pa prins Willem Alexander). El a duna tambe lès di kanto i di kor na kor di misa Adventista di Banda bou i kor di misa Katóliko na Soto;
• Di 1999 – 2004 ela tren e koro di ALM / DCA, kor New Horizon, huntu ku Desmond Gordon;
• Ela duna lès na Akademia Pedagógiko (1997-2002) i na SIFMA . Te ahinda Romeo ta dosente na SIFMA;
• Tambe ela duna lès na miembronan di “ Kor Pro Bista i Ritmo”. E mes tambe tábata kanta den e kor i tabata direktor suplente;
• Romeo tabata tambe Direktor musikal, bahista i kantante di Orkesta Pro Bista;
• Aktualmente e ta duna lès di kuatro, bas i kanto na Sentro di bario Souax. Tantu teoría komo práktika.

 

Otro aktividatnan di Kanto:

• Romeo tabata korista i kantante di Orkesta Nashonal di Kòrsou;
• Ela yega di kanta tambe komo invitado den “Doble Klásiko” i otro agrupashonnan musikal;
• o. di e banda B-connection regularmente e tabata haña petishon pa kanta na fiestanan di hasiment’i aña, kasamentu, aktividatnan sosial pa hende grandi. Hasta na entiero e sa kanta. Diferente biaha a invité tambe pa presentashonnan na Hulanda.

 

Rekonosementu :

• 22 di novèmber 2010 – riba dia di Santa Cicilia, AMAK (Asosiashon di músiko i artista di Kòrsou) a otorgá Romeo un pen di mérito pa tur su aktividatnan desplegá riba tereno musikal.
• 21 yanüari 2013 – a dediká festival di tumba di karnaval di Kòrsou na Romeo.
• 24 di mart 2017- homenahe na Romeo riba Plasa Brion, organisá dor di srs. Yves Schoop i sr. Aniceta.
• 17 septèmber 2017 – homenahe na Romeo na “International School” organisá dor di Fundashon Ka’i Mamai.
• 6 aprel 2023 – 4BU, Four Bands Union, a duna homenahe na Romeo.
• 29 aprel 2023 – Fundashon Pro Souax a duna Romeo homenahe komo un

baluarte ku a i ta duna su aporte na Sentro di bario Souax, dunando lès di

muzik i kanto.

• Tambe a dediká na Romeo un di e lokalnan kaminda ta duna lès di muzik. Sala Romeo Heije.

 

Willemstad,

(adaptá 23 mei 2023

 

 

 

 

 

 

Programashon:

Promé ku e fecha di e festival , lo tin un soundchek na Festival Center, kaminda e gruponan musikal , lo presentá konforme e sekuensia di presentashon.

Durante e konferensia di prensa lo saka e órden di presentashon.

Di e 6 agrupashonnan musikal, tin dos grupo musikal ku ya tin nan number.

Excellence ku lo kompañá e 3 hóbennan ta # 3

Classic XD  ku lo kompañá  Romeo Heye durante e showtime na final lo ta # 6.

E programa ta kuminsá 20.30 ku kanto di himno i e grupo musikal # 1 lo sigui despues.

Kada grupo musikal lo toka un “warm-up” di 10 minüt sigui ku e presentashon ofisial.

E grupo musikal mes lo definí e sekuensia di su partisipantenan.

Seguidamente kada grupo musikal, lo tin 8 minüt pa realisá su e kambio riba steidj.

Lo tin solamente 1 presentashon di e partisipantenan, i na final, na momento ku Hurado retirá, e último grupo musikal lo kompañá Romeo, sigui pa e homenahe.

Seguidamente lo anunsio e ganadornan, i entrega di premio

E partisipantenan ganador di e hóben i e adulto, lo presentá nan kansion ganador un biaha mas.

 

PARTNERNAN 2023

Un festival di kansion di nivel ta hopi kostoso.

Ta pa e motibu ei e aporte di gobièrnu, ta hopi esensial pa por mantené e preis na un manera pagabel.

Pues e sosten  finansiero di mas grandi ta di gobièrnu di Kòrsou.

Aparte di e aporte di gobièrnu, e komishon ya a risibí sosten di e algun Breanding Partner i ta pendiente di desishon di algun Branding Partner mas.

 

Un gradisimentu masha spesial na tur medio di publisidat, pa kubri  e festival, promé i durante e festival