Minister Pisas a firma un MoU na Aruba relashoná ku seguridat alimentisio
Minister Pisas a firma un MoU na Aruba relashoná ku seguridat alimentisio
Willemstad – Durante e siman di 29 mei pa 2 yüni tabatin un konferensia históriko riba tereno di “foodsecurity” entre e 6 islanan di Reino Hulandes. Aruba, Boneiru, Kòrsou, Saba, Statia i St Maarten su respektivo ministernan, diputadonan i representantenan di gobièrnu tabata presente pa huntu hasi palabrashonnan pa traha i kolaborá huntu pa fortifiká produkshon di mas kuminda di bon kalidat pa e komunidat di e islanan.
Riba djaluna 29 di mei representantenan di tur e 6 islanan a bini huntu pa será konosí ku otro. Djamars tabatin un rekorido pa wak e “bestpractices” di Aruba i un bishita na LVV di Aruba na Sta Rosa. Djárason tabatin e presentashon di e 6 islanan su “bestpractices” i deliberashonnan relashoná ku e temanan pa traha huntu riba dje.
Riba djaweps a elaborá mas profundo riba e diferente puntonan, palabrashon tokante di kolaborashonnan huntu i presentashon di esakinan. Djabièrnè tambe tabatin presentashon di e puntonan di kolaborashon i a hasi palabrashonnan konkreto.
Minister di Asuntunan General enkargá ku sektor di Agrikultura, Medio Ambiente i Naturalesa di Ministerio di GMN señor Gilmar Pisas, den e kuadro aki a bishitá Aruba pa tuma nota di e diferente trabounan ku e representantenan di GMN a traha riba dje i palabrashonnan ku a wòrdu hasí. Na Final di e konferensia Minister Pisas i demas mandatarionan a firma un MoU ku ta forma e base pa e 6 islanan bai traha konhuntamente ku otro riba tereno di “foodsecurity”.