PROME MINISTER TA CONTESTA PREGUNTANAN DI SEÑOR ANDREW VROLIJK TOCANTE SCOL SALUDABEL Y DIGITALISACION
Prome Minister Evelyn Wever-Croes:
Durante e di dos edicion di Conferencia di Prensa Hubenil ‘Periodista pa un Dia’
PROME MINISTER TA CONTESTA PREGUNTANAN DI SEÑOR ANDREW VROLIJK TOCANTE SCOL SALUDABEL Y DIGITALISACION
Diabierna 2 di juni a tuma luga e di dos edicion di Conferencia di Prensa Hubenil na unda a duna oportunidad pa 5 mucha di scol basico a bira ‘Periodista pa un Dia’ y haci preguntanan na Prome Minister Evelyn Wever-Croes den e sala di Conferencia di Prensa di Gobierno di Aruba.
Pa e ocacion aki, a invita señor Andrew Vrolijk, di TeleaAruba pa splica e muchanan kico ta periodismo. Andrew di TeleAruba a impacta e hobennan masha hopi y a ricibi varios pregunta hopi relevante cu su trabou den prensa. Na final di e Conferencia di Prensa Hubenil, cada mucha a haya oportunidad pa haci nan preguntanan na Prome Minister y señor Andrew tawata e ultimo pa haci su preguntanan basa riba maneho actual den desaroyo di enseñansa na Aruba.
E prome pregunta di señor Vrolijk na Prome Minister tawata tocante scol saludabel cu a wordo anuncia pa Minister di Enseñansa Endy Croes y Minister di Salubridad Dangui Oduber. Scol Saludabel, Prome Minister a splica, ta un concepto na unda ta encurasha cada scol pa ta mas saludabel den dos aspecto. E prome ta e cuminda cu ta wordo ofreci na nos muchanan ta mas saludabel entre otro fruta. E di dos aspecto ta movecion, motiva nos muchanan pa haci deporte.
E di dos pregunta di señor Vrolijk na Prome Minister ta tocante FUTURA y si tur mucha na Aruba lo mira technologia den tur klas. Dunando contesta na esaki, Prome Minister a menciona e diferente scolnan na Aruba cu ya caba a ricibi materialnan technologico pa enseñansa. A traves di FUTURA a concentra riba e scolnan di SKOA pa motibo cu e scolnan di DPS a haya e borchinan digital caba. A traves di FUTURA por yuda algun scol y ta concentra riba proyectonan piloto. Scol Preparatorio Cacique Aterima tawata e prome kleuterschool cu a cuminsa cu e Proyecto di digitalisacion sigui pa Scol Basico Cacique Macuarima, Colegio Pastor Kranwinkel y Sint Fransiscus College.
Cu esaki, e proyecto piloto di digitalisacion na scolnan a cera y e documento di e Proyecto lo wordo entrega pronto na Minister di Enseñansa pa asina ora e yega na fondo pa digitalisa tur scol, ya e sa cua sistema ta traha y cua no ta traha na Aruba.
FUTURA a cuminsa tambe cu e proyecto Edutech na unda tin 100 mil florin cada kwartaal y cu scolnan por registra nan proyecto di educacion y digitalisacion y huradonan totalmente independiente lo scoge e miho proyectonan cu lo ricibi 100 mil florin pa e kwartaal aki. Ya caba tres kwartaal a pasa caba y tin varios scol cu ya caba a haya e Proyecto Edutech. Minister di Enseñansa ta tumando e proyectonan aki over pa asina nan wordo canalisa den e maneho di enseñansa. “Mi speransa ta pa tur scol tin borchinan digital pa asina haci siñamento mas atractivo pa nos muchanan”, Prome Minister a expresa.
Prome Minister na final a gradici tur mucha y señor Andrew Vrolijk pa tur e pregunanan ricibi. Ainda tin oportunidad pa esnan cu ta interesa pa aplica pa participa na e proyecto ‘Periodista pa un Dia’. Cu ayudo di mayor of representante, por bay na e link: https://forms.office.com/r/kXrNkVcebg of scan e QR code riba pagina di Facebook Gabinete Wever-Croes pa yena nan informacion y preguntanan cu nan ta haya interesante pa puntra Prome Minister. E alumnonan cu a wordo selecta lo ricibi un e-mail di confirmacion.
