Petishon pa reunion di Komishon Sentral tokante rapòrtnan di Raad voor de Rechtshandhaving

Na: Presidente di Parlamento

Sra. America-Francisca

Wilheminaplein z/n

 

Willemstad 5 yüni 2023

 

Tópiko: Petishon pa reunion di Komishon Sentral tokante rapòrtnan di Raad voor de Rechtshandhaving

 

Apresiabel Sra. America-Francisca,

 

Nos a risibí diferente rapòrt di Raad voor de Rechtshandhaving (Mantenshon di lei) ku despues ku nan studia un aspekto di e kadena hudisial ku na nan pareser mester di mehoransa riba diferente aspekto di e situashon aktual, kasi nunka nos no ta atendé (follow up riba) e rapòrtnan aki komo parlamento.

 

Frakshon di PAR ta mira esaki komo un nesesidat pa asina por haña mas bista riba kon nos sistema ta sòru pa garantisá e seguridat di nos suidadanonan i e estado di derecho den nos komunidat. Meskos ku e palabrashon ku Ombudsman i ARC ku tur biaha ku nan a saka un rapòrt nan ta bini present’é na Parlamento, nos lo ke pa Parlamento ekstendé e mesun invitashon tambe pa Raad voor de Rechtshandhaving.

 

Nos ta menshoná espesialmente e rapòrtnan ku nos a haña den e último dos aña komo parlamento te ku awor di Raad voor de Rechtshandhaving.

 

Ta trata di e siguiente rapòrtnan:

• Jaarverslag 2022 i 2021 di Raad voor de Rechtshandhaving.
• Rapòrt final investigashon di inspekshon riba e kalidat di maneho, ehekushon di tarea, koperashon i resultadonan di Landsrecherche.

 

Tambe nos ke sa kon hustisia ta trata e rekomendashonnan i e defisiensianan ku e órgano ta señalá i ku tin solushon riba tèrmino kòrtiko.

 

Hasiendo uso di nos derecho di pidi reunion di Komishon Sentral konforme artíkulo 33 di Reglamento di Órden, nos lo ke invitá minister di Hustisia i tambe Raad voor de Rechtshandhaving pa Parlamento por elaborá, diskutí i debatí ampliamente riba e puntonan di atenshon i rekomendashonnan ku a wòrdu trese dilanti.

 

Asina un i tur por tende e lokual nan ku ta asina importante ku e Raad voor Rechtshandhaving ta tresiendo dilanti di e informashonnan ku tin di haber ku investigashonnan i tambe ehekushon i kumplimentu ku sugerensianan ku Raad voor Rechtshandhaving ta duna na Minister di hustisia i e kadena hudisial.

 

En espera di un pronto reakshon,

Danki di antemano,

 

Miembro di Parlamento, Partido Alternativa Real

 

Ana Maria Pauletta               Quincy Girigorie              Steven Croes             Zita Jesus Leito MBA