Ministerio Shalten Hato UPGRADE DEN PROSESO DI IMIGRASHON NA AIRPORT HATO
Ministerio Shalten Hato
UPGRADE DEN PROSESO DI IMIGRASHON NA AIRPORT HATO
Mirando ku nos ta den porta di fakansi grandi i ‘’high season’’ pa loke ta trata bishitantenan na nos pais, Konseho di Minister riba proposishon di Minister Hato a haña un presentashon di algun upgrade na Airport Hato. Durante e lunanan benidero lo tin vários kambio ku lo fasilitá e proseso di salida i entrada na nos pais pa nos bishitantenan.
Manera ta ampliamente konosí na Airport Hato tin algun eGates kual ta un sistema elektróniko ku ta uza data biometriko pa chèk pasaheronan i nan pasaporte. Den kuadro di alsa kalidat di servisio i efisensia pronto tur persona riba 16 aña ku tin un pasaporte ku chep, lo por pasa via di eGates ora ta biaha pa drenta òf sali Korsou. Ta importante si pa tene na kuenta ku tur mucha bou di 18 aña mester di pèrmit por eskrito di mayor of voogd pa por biaha.
Tambe tur persona riba 12 aña ku un pasaporte di Canada, Merka of Union Oropeo (Schengen) por hasi uzo di eGates na salida (naturalmente kompaña pa nan mayor). Adishonalmente Minister Hato a duna aprobashon pa asina nan por enkaminá e proseso pa remplasá e eGates nan na airport pa un modèl mas nobo i modèrno.
Aktualmente tin un total di 14 eGates, ocho eGates (G10) i seis eGates (GT11). Den futuro serkano lo remplasá tur eGates G10 pa e modèl nobo kual ta GT11. Esaki lo nifiká un proseso mas strukturá mirando ku tur e portanan lo ta di e mesun modèl pues lo trata di un sistema enbes di dos. E transishon pa un solo sistema ta hasi e proseso mas efisiente i ta mas benefisioso finansieramente pa Kòrsou. Banda di esaki lo instalá 4 ‘’totempaal’’ ku lo suministra informashon den 2023.
E upgrade nan ariba menshona lo sòru primeramente pa un mihó kòntròl na nos frontera i de paso lo sirbi pa baha e reinan largu na aiport. E efisensia ku esaki lo trese kuné lo redundá den um ambiente mas agradabel na airport tantu pa e bishitante komo pa e empleadonan di imigrashon.
