LOKÈT DI PÈRMIT KU SISTEMA DIGITAL DI MÚLTIPLE SERVISIO

WILLEMSTAD –  Djaweps, 29 di yüni 2023, Ministerio di Maneho di Gobernashon, Planifikashon i Servisio Públiko, Ministerio di Desaroyo Ekonómiko i Ministerio di Hustisia ta lansa konhuntamente un sistema digital nobo pa komunidat di Kòrsou. Nòmber di e sistema nobo akí ta  “e-CuraCase”.

E sistema digital nobo, “e-CuraCase”,  lo fasilitá e kliente pa por hasi petishonnan ‘online’ den e komfortabilidat di su mes kas. Di e forma akí klientenan no mester para mas patras den rei.

• Por hasi petishon awor pa 17 produkto ku Lokèt di Pèrmit ta brinda manera deklarashon di bon kondukta, petishonnan den kuadro di LOB, pèrmit di negoshi, pèrmit ambulante, pèrmit pa Horeca, uittrekselnan di Kranshi, mudansa i algun mas.
• E sistema ‘e-CuraCase’ lo tin tambe e Lokèt Digital nobo kaminda por buska informashonnan di e produktonan segun e tema nesesario, por ehèmpel kasamentu na Kòrsou, akta di nasementu, etc.
• Tambe, pa medio di un klek por bai traha sitanan online’ pa pasport, sédula, reibeweis i Domeinbeheer. Den e ‘lansamentu’ di e-CuraCase riba 29 di yüni 2023 benidero, lo re-introdusí e numbernan di telefòn 433-3123 pa Call Center di e departamentu Bentana di Informashon i 433-3135 pa e departamentu Afgifte, riba kual klientenan por yama Lokèt di Pèrmit. Tambe lo lansa e introdukshon di páginanan di ‘Social Media’ manera Facebook/Messenger, Instagram i Whatsapp, kaminda klientenan por manda mensahe pa informashonnan nesesario.

E numbernan di telefòn ariba menshoná ta bini bèk den uso na lugá di e numbernan temporal 434-1690, 434-1691 i 434-1692.

Di e forma aki Gobièrnu ta sigui halsa i brinda su servisionan públiko na komunidat di Kòrsou, ku ta yuda pa ta mas aksesibel i agradabel pa yega na e informashon òf e produkto ku e kliente mester.