Minister Larmonie-Cecilia a pidi Parlamentu sosten pa oumentá ònderstant i ‘toelage’ penshun di behes ku 30%

Minister Larmonie-Cecilia a pidi Parlamentu sosten pa oumentá ònderstant i ‘toelage’ penshun di behes ku 30%

Willemstad – E situashon laboral i nos situashon di pobresa na Kòrsou ta hopi serio. Asina Minister Ruthmilda Larmonie-Cecilia a ilustrá durante su presentashon den Parlamentu. Den komparashon ku otro islanan den reino, Kòrsou ta esun di mas pober. Nos tin un situashon serio ku ‘vergrijzing’ di nos poblashon ku ta reflehá bèk den nos forsa laboral. Sigur 30% di poblashon no ta forma parti di e merkado laboral. No obstante ku desempleo a baha 19.1 pa 13.1% na 2020, ainda e sifranan ta prekupante.

Ta bin aserka ku sigur 60% di esnan ku ta traha na Kòrsou ta gana menos ku 3000 florin pa luna i 42% ta gana sueldo minino o menos. Esaki ta e realidat ku pais Kòrsou mester dil kun’é tur dia. Kosto di bida a subi i tur partido enbolbí a konkluí ku e suma aktual ku esnan ku ta risibí ònderstant o ta risibí e ‘toelage’ debí ku e penshun di behes ta uniko fuente di entrada, no ta yega.

Pa e motibunan akí Minister di Asuntunan Sosial, Labor i Bienestar, Ruthmilda Larmonie-Cecilia a pidi Parlamentu sosten pa por oumentá ònderstant i ‘toelage’ pa esnan ku tin penshun di behes komo uniko fuente di entrada, ku 30%. Minister ta konsiente ku mester keda den kuadro di lei, sinembargo ke kuminsá implementá esaki den e lunanan ku ta sigui pendiente di e kambionan di lei ku mester tuma lugá. Durante e presentashon, un gran mayoria den Parlamentu a mustra komprenshon pa situashon i petishon di Minister Larmonie-Cecilia. Awor palabra ta na Parlamentu pa di forma ofisial sostené Minister Larmonie-Cecilia den e trajekto pa aliviá un tiki e situashon pa hendenan ku ta biba di ònderstant i peshun di behes por hasi esaki di un manera digno.