Djabièrnè 30 di yüni ultimo tabata tin tratamentu pro forma di e kaso di asesinato di e rapper Boechi.

Ambos sospechoso, Chris Z. (24) i Churendy C. (44) tabata mustra dede riba otro durante di un tratamentu pro forma emoshonal den Korte.

Segun vershon di Churendy ta Chris a tira Boechi sin motibu mientras ku Chris su vershon ta ku ambos tin un persona ku nan ta traha p’e ku ta e opdrachtgever.

Churendy a deklará ku e intenshon tabata pa hòrta e kadena di Boechi pero Chris a baha e bentana i tira for di den e vehikulo dirigí riba Boechi.

Durante di e tratamentu a bin sali na kla ku tin varios imagen di kamara ku a keda tumá riba Rooseveltweg durante di e anochi di e asesinato, 9 di desèmber 2022.

Hues a pidi ministerio publiko pa traha un kompilashon pa usa durante e tratamentu dia 27 di òktober proksimo.

Chris a deklará ku Churendy mester bisa tur kos inkluso ken ta e personanan ku a paga pa e asesinato di Boechi.

Churendy ta keda sospecha di a manehá e vehikulo ku nan tabata kore aden. Di su parti el a koperá kompletu ku e investigashon i a duna tur deklarashon nesesario. Alabes el a duna su DNA boluntariamente.

Chris ta keda sospechá di ta esun ku a lòs e triunan. E no a duna un deklarashon kompletu ainda i e ta nenga di duna su DNA.