Ku e miro pa duna mas sosten hurídiko na esnan di ménos rekurso MINISTER HATO A PROPONÉ UN ABOGADO MAS PA TRAHA KOMO PRO DEO

Ultimamente mas i mas por mira ku tin e nesesidat pa siudadanonan di ménos rekurso por haña asistensia hurídiko pro deo. P’esei den e kuadro aki, riba petishon di Minister di Hustisia, mr. Shalten Hato, Konseho di Minister a bai di akuerdo ku e proposishon aki i a outorisá señora R. Nieuw (abogado na Kòrsou) pa ofresé servisio hurídiko grátis na personanan di ménos rekurso.

Den kaso ku un persona su entrada ta mas haltu ku e límite di entrada anual pa kual por bini na remarke pa un abogado pro deo i e persona su situashon ekonómiko no ta permiti’é di paga un abogado, e por pidi dispensashon na Minister di Hustisia. Por pidi dispensashon pa bini na remarke pa un abogado pro deo solamente pa kasonan sivil.

Si un siudadano ta bini na remarke, Minister di Hustisia lo firma un Dekreto Ministerial (Ministeriële Beschikking) den kual ta indiká ku e siudadano ta risibí dispensashon pa un abogado pro deo. Ku e Dekreto Ministerial e siudadano por akudí na e ofisina di Kas di Bario bou di kual e ta resortá i einan e lo lo obtené mas informashon. Den kaso di un konflikto laboral e siudadano mester akudí ku e Dekreto Ministerial na Ministerio di Desaroyo Sosial, Labor i Bienestar, sektor di labor, i e konsulènt lo sigui guia e siudadano den e proseso.

Si un siudadano tin un problema di derecho penal i e a wòrdu detené òf a wòrdu enkarselá, e siudadano no mester hasi e trámitenan ariba menshoná. Despues di detenshon, e siudadano lo haña bishita di un abogado outomátikamente òf e siudadano lo haña oportunidat pa yama su propio abogado.