LADRONISIA DI WAYA DI KORIENTE KU A BOLBE LANTA KABES TA PÈRHUDIKANDO KLIENTENAN I AQUALECTRA

KOMUNIKADO DI PRENSA

Aqualectra i Polis ta kolaborá pa atendé ku man duru

LADRONISIA DI WAYA DI KORIENTE KU A BOLBE LANTA KABES TA PÈRHUDIKANDO KLIENTENAN I AQUALECTRA

Willemstad 17 di yuli 2023 Hòrtamentu di wayanan di suministro di koriente pa hasi uso di esakinan di manera klandestino a bolbe lanta kabes. Durante di e último luna, na varios okashon, a bin detektá kaso di ladronisia di wayanan di koriente den e ret di distribushon di Aqualectra. Esakinan den gran mayoria di biaha na sitionan kaminda tin menos trafikashon di hende. Malechornan ku ta kometé e akto di ladronisia no ta tene kuenta ku e kasnan ta keda sin koriente te ora ku Aqualectra por a bolbe instalá wayanan di koriente di nobo. Aparte di perhudiká e klientenan di Aqualectra i kousa Aqualectra gastu innesesario, e ladronnan ta pone nan mes bida na peliger ku e akto aki. Aqualectra i Polis di awor en adelanto lo atendé tur esnan ku ta kometé e akto aki ku man duru. Komunidat por koperá dor di raportá kaso òf vehíkulonan ku nan mira envolví den e kasonan aki na telefòn 463-2911 (Aqualectra òf 917 (Polis.)

Pa basta tempu Kòrsou no a konosé e tipo di ladronisia aki. Sinembargo e insidentenan, un tras di otro, ta indikashon ku ladronisia di e forma aki a bolbe lanta kabes. Areanan ku último tempu entre otro a keda afektá pa ladronisia di waya di koriente tabata Pannekoek, Seru Machu, Zuid Choloma, Sabana Baka, Seru Kloof, Ronde klip , Monta a i Fuik. Na e sitio por tuma nota ku e ladronnan no ta tene kuenta ku e peliger ku nan ta eksponé nan mes na dje ora nan kometé e akto kondenabel aki.

Aqualectra i Polis tin atenshon speshal pa e ladronisia di kabel di koriente. Aqualectra ke pidi koperashon di komunidat pa na dado kaso nota algún individuo ta intentá òf kometé e ladronisia aki, pa mesora raportá esaki na Aqualectra na number di telefòn 463-2911 (Aqualectra òf 917 (Polis.) E number aki ta únikamente pa raportá akto di ladronisia di waya di Aqualectra ku ta tuma lugá òf pa raportá vehíkulonan usá pa e ladronnan. Por sigui raportá hòrtamentu di awa i koriente na 0800 0135.